Ongi etorri balorez jositako blogera! Hemen, eskolan baloreak lantzeko hainbat tresna aurkituko dituzu: bideoak, irudiak, testuak, albisteak, hausnarketarako gaiak...
Zeure gustukoa izatea espero dut. Gozatu eta partekatu!
Aspalditik ez nintzen hemendik pasatzen, baina @RaulGomez82-en bideo honek zerbait mugitu du nire barnean (eskerrik asko, Leire!) eta hemen partekatzeko beharra sentitu dut...
Tamalez, oso azkar bizi izaten gara eta ez gara konszienteak izaten daukagunaz. Bideo honek astintzeko eta geure lekuan kokatzeko balio du. Ikusten duzunean, ematen duen mezua entzuteaz gain, munduan zehar agertzen irudietan erreparatzeko gomendatzen dizut. Horrela, zorte onekoak garela ohartuko zara.
Ikasturtearen amaiera iritsi da. Zelan joan zaizu ikasturtea? Arin pasatu da, ezta?
Askotan bizitza arinegi igarotzen da eta ez dugu hartzen behar den denbora hausnartzeko bizi izandako uneez edota hartutako erabakiez. Aipatutako une horiek ez lirateke soilik bereziak izan beharko, egunerokoak ere bai aztertu beharko genituzke. Gauza bera gertatzen da erabakiekin, batzuk potoloagoak izango dira beste batzuk baino. Baina honi guztiari analizatzeko denbora eskaintzea garrantzitsua da geure helburuak markatzeko eta jakiteko zer nahi dugun bizitzan.
Egun gutxi barru gure bizitzako beste atal bat amaituko dugu ikasturtearen amaierarekin batera. Zuek, ikasleok; zein gu, irakasleok. Batzuontzat atal txikia izan daiteke datorren ikasturtean klasekide eta irakasle berdinekin jarraituz gero. Beste batzuontzat, aldiz, handiagoa izango da eskola aldaketa izaten badute. Izaten dena izaten dela amaierara iritsiko gara guztiok eta hemendik, ikasturtean egindakoaz hausnartzera gonbidatzen zaituztet.
Beharbada, hurrengo bideoa ikusten duzunean hobeto ulertuko duzu nire proposamena:
Argiago ikusten duzu orain? Esperimentu honetan parte hartzen dutenei gertatzen zaiena saihestea nahi dut. Nahiz eta pertsona helduak izan, askotan oso azkar, azkarregi hain zuzen ere, bizi dira eta ez dira konturatu bizitza eskapatu zaiela
Ez utzi eramaten, ez izan beldurrik, zuk nahi duzuna izango zara, eta ez beste batzuek espero dutena zutaz. Irten zaitez konfor eremutik!! Horretarako, hartu hausnartzeko eta pentsatzeko denbora eta ezarri zure lehentasunak. Horien arabera, erabakiak hartu nahiz eta aldaketak gauzatu behar zure bizitzan. Gogorrak izan daitezke, noski, baina merezi izango du, ikusiko duzu!! Inoiz ez da berandu norberak nahi duen bizitza bizitzeko!!
Duela egun batzuk bideo hau jaso nuen (eskerrik asko Jone!) hemen publikatzeko. Gustatu zitzaidan ideia laster, eguraldi ona hasten denean, guztiok joango garelako hondartzara. Bideoa ikusi ondoren, beharbada beste modu batez jokatuko duzu aurrerantzean.
Ulertzen duzu ume hauen haserrea? 30 urtetan itsasoetan plastiko gehiago egongo da arrainak baino! Ez al da beldurgarria datu hori? Beste datu bat oso penagarria da arrainek guk botatako plastikoa jaten dutenez, arrain horiek guk jaten ditugunean jaten dugula guk botatako plastiko hori... Imaginatu ahal duzu zenbat den 165 milioi tona? Nik ez... Ez naiz gai irudikatzeko, asko da eta... Pertsona batzuek plastikoak biodegradagarriak diren aitzakia erabiltzen dute, baina ume hauek ematen dizkiguten datuak harrigarriak dira. 1000 urte behar dira plastikozko botila bat desagertzeko.
Datu hauekin, hemendik aurrera eta batez ere uda honetan hondartzara zoazenean, beste modu batez jokatzea espero dut. Ba al dakizu zer egiten dudan nik hondartzara joaten naizenean? Harearekin jolasteaz aparte, ertzetik paseatzen noan bitartean, ikusten ditudan sastar guztiak jasotzen ditut eta zakarrontzira botatzen ditut itsasora joaten saihesteko. Beraz, aspertzen bazara badakizu zer egin dezakezun planeta salbatzeko eta 12 urte horiek luzatzeko!
Villabonako udalak pasa den astean argitaratu zuen gai honekin lotutako bideoa "Zaindu maite duzuna", Kattalin Zubizarretaren kantuarekin eta Mr. Euskaldunen marrazketarekin. Ikusi eta entzun!
Abestiak dena dio, gutxi gehitu ahal zaio. Horixe ba, guztion eskuetan dagoela lurraren etorkizuna!
Denbora luze da hemendik pasatu gabe, baina gaurko eguna garrantzitsua da LGTBI FOBIAREN KONTRAKO NAZIOAREKO EGUNA ospatzen baita. Eusko Jaurlaritzatik egun inportantea izendatu dute aniztasun afektibo sexuala gaia eskoletan jorratzeko, gaiari buruzko gogoeta eginez eta prebentzio neurriak hartzeko beharrizana plazaratuz.
Egun honen jatorria gehiagotan plazaratu da blog honetan, baina geure burua kokatzeko laburpentxo bat egitea ez dago soberan:
1990ko maiatzaren 17an Munduko Osasun Erakundeak (MOE) homosexualitatea buruko gaixotasunen zerrendatik kanpo utzi zuen. Beraz, aurten 29 urte pasako dira erakunde honek erabaki hori hartu zuenetik. Azken finean, homosexualak gaixoak zirela esateari utzi zionetik. Izan ere, garai luze batean, gaixoak izateaz gain, gaizkileak ere baziren. Harrezkero, urtero, maiatzaren 17a LGTBIQfobiaren Aurkako Nazioarteko Eguna aldarrikatzen da. Aldarrikatu hitza idatzi dut, eta ez ospatu, aldarrikatzen eta borrokatzen jarraitu beharra dagoelako, nahiz eta dagoeneko 29 urte pasa diren.
Eusko Jaurlaritzako Hezkuntza Sailak Bai, baudazkagu erreferenteak materiala sortu du Berritzegune Nagusiarekin batera. Baina ez dira bakarrak honen inguruko informazioa luzatzen dutenak; izan ere, STEILAS sindikatuak ibilbide luzeagoa dauka gai honetan. Hona hemen materiala.
Ondo dago materiala eskura izatea, baina askoz garrantzitsuagoa da guztion inplikazioa. Zentro eta etxe guztietan derrigorrez lan egiteko gaia da. Sexo edo genero identitatea aukeratzeko pertsona guztiok dugun askatasunari eraso egiten dion edozein iritzi, jarrera edo jokabide lesfobiko, homofobiko, transfobiko edo bifobikoren aurka jo behar dugu guztion artean.
Hemendik ere ekarpen txiki bat egin nahi dut bideo honekin. LGTBIfobiaz aparte, gaur ospatzen den beste egun batekin dauka lotura, Nazioareteko Internet egunarekin hain zuzen ere:
Zelako amaiera espero zenuen zuk? Gehiengoa amaiera ona susmatzea espero dut, horrek esan nahiko luke bide onetik goazela.
Ikusi duzunez Interneten erabilera egokia eskaini digu bideoak, sare sozialak modu onuragarrian erabil daitezkeela jakinaraziz. Horretan ere indarra egin behar da zentruetatik ikasle zein irakasleen konpetentzia digitala lantzen. Badira ekimen isolatu batzuk eredugarriak direnak, baina sistematizatzeko gaia da eta bide luzea dugu aurretik. Zerbait gehiago jakin nahi izanez gero honen inguruan (ikasle zein irakasle berdin da), hemen asmoz.org-k egindako materiala luzatzen dizugu. Informazioaz aparte, ariketak egiteko aukera ere badago. Saiatu eta ebaluatu zeure burua!
Gaur, otsailaren 11 guztietan bezala txoko txiki eta xume honetatik bat egiten dut Zientziaren arloko Emakume eta Neskatoen Nazioarteko Egunarekin. Ez dakit zelako oihartzunik izango duen nire mezuak, zenbat pertsonenganaino iritsiko den eta zenbatengan eragina izango ote duen. Baina gai honetaz hausnartzea komenigarria dela uste dut. Bai eskolan bai etxean erantzukizun itzela daukagu berdintasunaren gaiarekin.
Jarraian "Ez da pertzepzio bat" bideoa luzatzen dizut, ekoizpen honen bidez salaketa egin nahi zuten eta esku hartzeko eta batik bat lan egiteko deia zabaldu. Gizon eta emakumeek eskubide eta aukera berberak izango dituzten gizarte bat lortzeko lanaren aldeko deia da. Iazko bideoa da eta Euskal Herriko Unibertsitatean grabatua izan zen bertako bost zientzialari eta ikertzaileren parte-hartzeari esker:
Itziar Alkorta, biokimikaria.
Arantza Aranburu, geologoa.
Gotzone Barandika, kimikaria.
Txelo Ruiz, informatika-ingeniaria.
Ana Zubiaga, genetista.
Hurrengo bideo honetan, "Nire alabak ingeniaria izan nahi du" izenekoa, ingeniaritzako karreretara jotzeko orduan mutil eta nesken artean dagoen alde handian zentratu nahi izan du EHUko Kultura Zientifikoko Katedrak, bai eta arrail horretan estereotipoek duten eraginean ere.
Umorea tresna gisa erabiliz, karrera hautatzeko orduan, neskatoei kontzienteki edo inkontzienteki transmititutako estereotipoek izan dezakete eragina agerian utzi nahi izan da.
3. urtea da egun honen berri ematen dudala blog honetan eta posiblea den heinean, jarraituko dut desberdinasunaren alde aldarrikapenak egiten, horrelako egunak ospatzeko beharra desagertzeko nahiarekin.
Material gehiago nahi izanez gero, hona hemen aurreko urteetako sarrerak. Bota begirada bat, bideo eta datu interesgarriak daude eta!:
Gaur, otsailaren 6an, Emakumeen Genitalen Mutilazioaren aurkako Zero Tolerantziaren Nazioarteko Eguna ospatzen da. Askotan genero berdintasunaz eta giza eskubideez aritu izan da blog honetan eta ablazioak bi gai hauek biltzen ditu.
Datu harrigarri batzuekin hasiko naiz:
Urtean bi milioi neskei egiten diete ablazioa; egunero 6.000 dira sufrimendu hori pairatzen dutenak; minutu batean bost emakume hain zuzen ere.
Guztira, 130 milioi neska eta emakumek jasan dute ablazioa mundu osoan zehar eta jarraitzen dute egunero tradizio honekin herrialde ezberdinetan.
Afrikako 28 herrialdeetan eta munduan beste hainbat herrialdeetan (Arabia Saudi, Yemen, Malaysia, Indonesia eta India adibidez) oraindik ere tradizio honekin jarraitzen dute. Gainera, azken urteotako migrazioaren ondorioz, Australia, Kanada, Zelanda Berria, Europa eta Ameriketako Estatu Batuetako leku askotan ere ablazio kasuak eman dira.
Hotzikara sortzeko moduko datuak, ezta?
Jarraian txeratutako bideoak ere oilo-ipurdia jarriko dizu, erne egon!:
Ea ez diren urte asko igaro behar egun hau sekula ez berriro ospatzeko...
Itxaropenaz betetako abesti batekin bueltatzen naiz (eskerrik asko Meritxel!). Kantak dioen bezala, nik ere nire momentuak ditut eta pozik, triste eta indartsua, guzti hori naiz etengabe, etengabe... Ni neu naizena izanik esku betez bihotz biziz#muxotepotolobat eta Gari abeslariaren ekoizpen hau partekatu nahi dizut. Ez inoiz galdu itxaropena, beti dago norbait gure ondoan egongo dena bizitzari zurrut egiteko.
Ez ahaztu, bakarra zara mundu honetan, beraz, zu zeu izan, eta goizero altxatzen zarela, egunon mundo ozen oihukatu, eskertuz aurrera egiteko beste aukera bat oparitzen dizula bizitzak.
Blog honetan askotan jorratu da errespetuaren gaia. Gaur, berriro ere ekartzen dizut baina beste ikuspegi batetik. Hain zuzen ere, Euskaraldiaren atean gauden momentu honetan, geure hizkuntzarekiko errespetua adierazten duen istorio bat ekartzen dizut.
Jonek euskara ikasteko ahalegina egin zuen bere semeak berdintasunean, aniztasuna errespetatzen, gauza txikiak maitatzen eta albokoak zaintzen hezi nahi dituelako.
Amaitu nahi dugu egiten duen gogoetarekin:
"Bide errez eta laburrena ez da izaten biderik onena. Gauza politek esfortzua exigitzen dute. Baina gero, datorrena askoz ederragoa da."
Mr Euskaldunen irudi alai honekin agurtzen zaitut, ahobizi edo belarriprest hori!
Azaroak 25 gertu dago eta laster hasiko gara egun horren inguruko informazioa jasotzen. Iaz gai honi emandako trataera ikusi nahi baduzu, klikatu hemen. Aurten finagoa den indarkeriari erreparatuko diogu, mikromatxismoei hain zuzen ere.
Definizioz, gure egunerokotasunean jasaten eta eragiten ditugun eraso matxista ikusezin eta baliogabetuak dira. Edonon topa ditzakegu: kalean, dendetan, tabernetan, geure etxeetan baita geure artean ere! Kontuz ibili behar dugu, horrek eragina baitauka geure bizitzengan. Batzuetan ikustezinarena egiten dugu edo zama kendu nahi diegu... Kezkagarria benetan oraindik ere horrelakoak gertatzea!
Oraindik ez baduzu irudikatzen zehatz-mehatz zertaz ari garen, hona hemen bideo labur bat oso ondo azaltzen duena zertan dautzan eraso hauek.
Ulertu al dituzu guztiak? Ezagunak egiten zaizkizu? Gehiagorik bururatzen al zaizu?
Hurrengo bideoan, DBHko ikasle batzuk horrelako egoera eta beste batzuk antzezten dituzte mikromatxismoak zer diren azaltzeko. Aupa zuek!
Horrelako egoerak gero eta gutxiago gertatzea espero dut. Bururatzen al zaizu nola saihestu? Zer egin genezake?
Askotan helarazi dut blog honetako hainbat argitalpenetatik, hemen egindako gogoetekin mundua hobetzeko itxaropena daukadala. Zuetako gutxi batzuengana iristeko gai banaiz eta nire ekarpenekin pertsona hobeak izaten laguntzen badut, astero ematen dudan denborak merezi du. Inoiz ez dut jakingo hala den, baina ideia horrek laguntzen dit aurrera egiten.
Hezkuntza sistemak askotan alde batera uzten ditu garrantzitsuak diren bizitzako alor eta egoera pertsonaletan, sozialetan, akademikoetan eta lanekoetan, arazoak eraginkortasunez konpontzeko behar diren konpetentziak. Honekin, betiko arloak baztertzen ari naiz eta indarra eman nahi diet elkarbizitzari, ekimena izateari, sentimendu, pentsamendu eta ekintza pertsonalez gogoeta egiteari... Hori da hain zuzen, hemen lantzen den guztia.
Zuk, irakurle hori, etorkizuna eraikiko duzu eta horretarako jarrera oso garrantzitsua da. Bizitzarako jarrera egokia beharrezkoa da edozein egoeratan, eta hiru umek azalduko digute hurrengo bideoan (eskerrik asko, Leire!):
Zein azalpen argia, ezta? Izan presente ume hauek errepikatzen duten ideia:
"Egunero praktikatzen duzun horretan, oso ona bihurtuko zara".
Orain zure esku dago alaitasuna, errespetua edo zoriona praktikatzea horretan aditua bihurtzeko, eta beste alde batera utzi protestatzea, alde txarra topatzea, haserretzea, kezkatzea oraindik gertatu ez den edozein gauzagatik...
Nola bizi izango duzu lasaiago? Ohartzea lortu baduzu, lehenengo urratsa emanda daukazu!
Ez naiz Halloween egunaren bat ere zale. Izan ere, duela urtebete sarrera egin nuen jakinarazteko euskal kulturan ohitura hau aintzinean ospatzen zela eta gaur egun leku batzuetan berreskuratzeko saiakera egiten ari dela.
Ezjakintasun handia dago egun honen inguruan, gehienek uste dute Estatu Batuetako tradizioa dela baina ez da horrela, jatorria Irlandan omen dago. Duela 1.900 urte inguru hasi zen ospatzen zelta herriaren eskutik...
Gaur egun, gure ingurua guztiz kutsatuta dago, ospatu egiten da baina ez dakigu zer den ere. Kultura apur bat ez datorkigu txarto, baina hobe etxetik hasi, hori dela eta iazko sarrera ez baduzu ikusi, hona hemen Arimen gaua ikusteko aukera.
Aurtengo ekarpena, hurrengo bideoa da, aitzakia da berdintasuna eta askatasuna aldarrikatzeko.
Gaur mozorratzen bazara, libre sentitu jantzia aukeratzeko orduan eta besteenak errespetatu. Eta etxez etxe bazoaz, gutxienez "ziria edo saria" euskal esamoldea erabili!
Izenburua soilik irakurrita, ondo jotzen du belarrira eta zerbait goxoa ekartzen dizudala eman dezake, ezta? Hurrengo bideoak argituko dizu kontu hori, erne!
Argi dago ez dela zerbait atsegina. Zoritxarrez, jende askok pairatzen du gaixotasun hau eta baztertuak izaten dira. Hori da bideoaren kanpaniaren xedea, agerian jartzea gaixotasuna eta ezagutaraztea ez dela kutsatzen.
Gaixotasun hau, Epidermolisis Bullosa, gaixotasun arraroen barruan dago. Gaitz hau dutenek oso azal ahula dute eta horregatik gaixotasun honi Tximeleta Azala ere deitzen diote.
Jarraian, gaixotasunaren ezaugarri batzuk luzatzen dizkizut:
Gorputzeko edozein organori egiten dio eraso, urdailari, esofagoari, hesteei, begieie, ahoari…. Hori dela eta, mota bateko edo besteko ezgaitasunak sortzen dira (fisikoa, psikikoak, sentimenei dagozkienak… ). Gaixotasun kronikoa eta sendaezina da eta dieta espezifiko bat eraman behar izaten dute.
2-4 ordutako sendaketak egin behar izaten dituzte egunero edo bi egunetik behin. Material berezia behar dute, eta batzuetan gorputz guztia estaltzen zaie. Sendaketek beste jarduerak egiteko denbora kentzen die.
Beste arazoetako bat, eskuak erabiltzeko gaitasuna galtzea da.
Gaixotasun honek ez du fisikoari ezta pairatzen dutenei bakarrik eragiten.
Bizitza familiarrean eta laboralean ere badu eragina.
Eskolako eta laneko absentismo-indizea ere igo egiten da, hitzordu desberdinak eta ingresoak direla eta.
Erlazio sozialak ere murriztu egiten dira seme alaben zainketan eta ongizatean ardurapean egoteatik.
Gaixotasun honen prebalentzia baxuarengatik, ezjakintasuna dago. DEBRA-PIEL DE MARIPOSA elkartetik profesional desberdinak hezitzen dira zainketa hobeak eskeintzeko.
Pairatzen duten egoerak, isolamendu soziala pizten du eta askotan beraien artean bakarrik erlazionatzen dira. Hori dela eta ekarri dizut, ahalik eta gehien zabaltzeko eta ezjakintasunetik ateratzeko.
Egun hau aldarrikatuz zabaldua izan zen blog hau duela 3 urte, eta, zoritxarrez, gauzak ez dira apenas aldatu eta ezin izan da egutegitik kendu. Jarraian aurreko bi urteetako sarreretan egindako ekarpenak, materialak eta gogoetak dituzu: 2016 eta 2017
Neskatoen Nazioarteko Egunaren xedea bere eskubideak hautematea da baina, batez ere, mundu osoko neskek pairatzen dituzten arazoei aurre egitea, diskriminazioa eta bortizkeria besteak beste.
Egun hau, generoen arteko eskubideak banantzeko beharretik jaio zen 2011 urtean, bada mutilak eta neskak oso desberdinak dira eta arreta erdiratzen du neskek aurrean dituzten erronkei ekiteko eta bere ahalduntzea eta bere giza eskubideak betetzea bultzatzeko beharra.
Adi egon hurrengo bideoari, UNICEFek egina da Hegoamerika eta Cariberako neskentzat (eskerrik asko, María!). Oso adierazgarria da!
Argi eta garbi uzten digu ikusten dena baino gehiago direla neskatilak, onerako eta txarrerako noski. Beharbada, gure inguruan ez dago desoreka nabarmenik eta hau nahiko urrun gelditzen zaizu, baina neska eta mutilen arteko desoreka existitzen den errealitatea da. Jarraian jarritako bideoan (eskerrik asko, Leire!), krisialdieetan neskek pairatzen duten desoreka salatzen da.
Amaitzeko, Legoren irudi bat luzatzen dizut. Pozgarria da ikustea super heroinak bultzatzen ari direla. Baina, aldi berean, penagarria da paretasuna bultzatu behar izatea umeen jolasen bitartez. Ea egunen batean lortzen den hain beharrezkoa den oreka hori!
Gaurko sarrera balorezale batzen inguruan izango da. Duela gutxi hasi berri den proiektua aurkezten dizut: baloreak giza balioak Euskal Herriko txoko guztietara musikaren bidez helarazteko sortua, eta 8-14 urte bitarteko bost haurrek osaturiko musika talde bat du ardatz.
Netsanet, Kaiet, Luna, Iradi eta Asier kantua biziki gustuko duten bost neska-mutil dira. Baloreak giza balioei balore handiz helduko dien proiektu berritzailea da. Eta blog hau baloreetan oinarritzen denez, proiektua partekatu nahi dizut. Oso modu polita daukate baloreak helarazteko, musika bitartez. Lehenengo abestia elkartasunaren inguruan, hemendik elkarbizitza etiketapean hainbat aldiz landuta dagoena.
Pasa den ekainean, mundu guztiak #Rusia2018 futbol mundialari begira zegoen bitartean, inork ikusten ez zuen beste futbol mota bat bazegoen, askoz garrantzitsuagoa eta bizikidetza sustatzen zuena.
10 urte betetzen dira Israelek lur, itsas eta aireko blokeoa ezarri ziola Gazari, baina kirola askatasunerako, bizitzarako eta balioak sustatzeko eragile bihurtu da. UNRWA Euskadiren laguntzarekin, emakumeen futbol talde batek haien eguneroko bizitzetan mugak haustea lortu du, Israel eta Palestinaren arteko gatazkari gola sartuz.
Bideo hau Euskadiko GGKEen Koordinakundeko #30UrteAztarnaUzten kanpainaren parte da eta erakunde honen eta Euskadiko lankidetza politiken 30. urteurrenaren testuinguruan kokatuta dago.
Txapela kendu baino ezin dugu egin eredu bikain honen aurrean eta beraiengandik ikasi zer lortu daiteken kirolaren bitartez. Aupa zuek, neskak!
Zelan doakizu ikasturtearen hasiera? Apur bat despistaturik? Gogo gutxirekin? Gogorra izan al da itzulia? Beharbada, pittin bat nagiturik zaude oraindik ere. Orokorrean, normaltzat hartzen dira horrelako jarrerak eta gogo gutxirekin hastea eskolan, ez baikara konturatzen zelako aukera aparta daukagun eskolara modu normalizatu batean joan ahal izateagatik.
Hurrengo bideoek lagunduko zaituzte ikusmira aldatzen, erne!:
Konturatzen zara orain zelako zortea daukazun? Hezkuntza, pertsona guztiek daukaten eskubidea da baina, tamalez, munduan hainbat lekutan ez dago bermatuta. Fijatu zara zein pozik dauden umeak? Zelako gogoekin joaten diren eskolara? Nola eskertzen duten motxila eta arropa berria estrenatzea? Bideoak ikusi ondoren, daukazun aukera aparta gehiago baloratzea espero dut.
UNRWA erakundeak bideo hauen bitartez salatu du egoera hori ume palestinarren duintasuna aldarrikatuz.
UNRWA Ekialde Hurbilean dauden Palestinako Errefuxiatuentzako Nazio Batuen Agentzia da. 60 urte luzeren ostean, UNRWAren zeregina da Jordanian, Libanon, Sirian eta Palestinar herrialde okupatuetan dauden 5 milioi palestinar errefuxiatuei arreta, babesa eta defentsa eskaintzea, euren egoerari irtenbide baketsua eta iraunkorra ematen zaion bitartean.
Gaur egunean, UNRWAk Palestinako 5 milioi errefuxiaturi baino gehiagori –horietako 1,8 milioi 58 kanpamenduetako batean bizi da- ematen die laguntza eta babesa. Agentziaren lana, batez ere, arlo hauetan kokatzen da: Garapena, Babesa, Hezkuntza, Osasuna, Gizarte Zerbitzuak, mikro-finantzaketak, Laguntza Humanitarioa eta larrialdietan erantzuna ematea.
Euskadi mailan, 2006an sortu zen bi helburu nagusi hartuta: Euskal gizarteari 5 milioitik gora palestinar errefuxiatuek bizi duten egoeraren berri ematea eta 60 urtean UNRWAk burutzen duen lan humanitarioa eta babesekoa zabalaraztea. UNRWA Euskadik funts publikoak nahiz pribatuak biltzen ditu UNRWAk errefuxiatuekin burutzen dituen lanetan laguntzeko, eta euskal gizartean nazioarteko elkartasuna eta lankidetza sustatzeko.
Erakunde honen langileak bolondresak dira, beraiei esker mundu hobea eraikitzea posiblea izango da. Ziur zuetako norbait, modu apalean bada ere, prest egongo dela besteei laguntzen. Hori da blog honen xedea, pertsona hobeak hezten laguntzea.
Pasa den ostiralean ikasturte honetako lehenengo mezua argitaratu nuen, baina asteburu honetan Ainhoa Fernández Araluce (@araluze19) erabiltzaileak egindako bideoa topatu dut eta merezi du zurekin partekatzea. Oso lan fina egin du mezu motibagarriak luzatuz ikasleak (eta irakasleak!) motibatzeko. Apur alferrontzi bazabiltza ikasturte hasiera honetan, lagunduko zaituelakoan nago:
Fijatu zara argazkietan? Oso esanguratsuak dira. Lehenengo argazkian agertzen den umea izan ezik, beste guztiak zoriontsuak dira, nahiz eta errekurtso gutxi izan. Zorte handikoa zara eskolara joan ahal izateagatik; tamalez, ume guztiek ez daukate aukera paregabe hori.
Bideoan agertzen den azkenengo galderari, baietz erantzun izana espero dut. Bestela, nagiak astintu, izan ausarta eta bilatu gogoa eta ilusioa ikasturte honen erronkei aurre egiteko. Abentura hau aparta izan daiteke eta!
Udako oparraldia amaitu da eta hasiera berriari ongi etorria egiteko unea iritsi da. Gaurtik aurrera, aukera berria daukazu esku artean, iraganeko akatsak ez errepikatzeko eta bide berria eraikitzeko akats horiengandik ikasitako guztiarekin.
Blog honi dagokionez, bizirik iraun dezan espero dut, baina lan handia da eta zure kezkak edo ekarpenak partekatzea eskertzekoa da. Horreterako, baloreak@gmail.com helbidera bidali ahal dituzu proposamenak, bideoak, kantak edo dena delakoa.
Iazko ikasturte hasieran egin nuen bezala, abesti batekin hasiko da ikasturte hau, Go!azenen eskutik berriro ere bai. Bertan mezu potenteak ematen dira, guztiz aplikagarriak hastear dagoen abenturarako. Hona hemen abestiaren zatiak hausnarketa txikiekin:
Dena zure eskuetan dago, has zaitez esku artean daukazun hazia maitatzen, aukera paregabea da eta!
Eguzkia goizean, agertu da mendien artean, baina beti ez da horrela izango eta lainoak topatuko dituzu. Hala ere, jakin behar duzu eusten eta aurrera egiten!
Keinu txiki bat bada ere, mundua alda dezake. Inoiz ez dakizu zelako eragina izan dezakeen keinu txiki batek ondoan daukazun besteengan. Espero dezagun onerako izatea keinu txiki (edo handi) horiek!
Banan banan elkartu gara bidean, milaka ale baso bihurtu zale.
Oso inportantea zara, ikasle! Uste duzun baino askoz ere gehiago, zure argi izpia gure eguzkia da. Indarra ematen diguzu irakasleoi gure onena emateko.
Mugimenduan tinko, helmugaraino brinko iritsiko zara ilusioa mantenduz gero.
Amaitzeko, hona hemen abestia! Entzunda izan arren, ziur orain beste modu batez interpretatuko duzula. Gozatu!
Gutxi gehiago dago esateko: bidaia ona izan dezazun 2018/2019 ikasturte honetan!
Pasa den ikasturtearen amaieran bezala, itxiera eman nahi diogu bukatzear dagoenari. Bizitzaren ziklo eta etapa guztiek merezi dute amaierako puntua fundamentuz idaztea. Gaur ez bada, bihar amaituko dira klaseak; eta merezita edo ez, deskantsatzeko, deskonektatzeko eta atseden hartzeko garaia iritsi da. Izaten dena izaten dela zeure egoera, amaiera iritsi zaizu eta horrekin batera, baloratzeko unea ere bai. Hori da, hain zuzen, sarrera honen xedea, aurten egindako lana "baloratzea".
Lehen aipatu dugun legez, hasiera daukan guztiak, amaiera ere badauka. Irailean arraun egiten itsasoratu zinen eta, gogorra eta luzea izan arren, amaitu egin da estropada. Hurrengo bideo honek oso ondo azaltzen digu arraun egin dugun bitartean, zeintzuk izan diren itsasoan aurkitu ditugun zailtasunak, erronkak eta laguntzak. Zuretzat espresuki eginda dago, gustatzea espero dugu:
Dagoeneko kaian zaude, nekatuta estropadan egindako esfortzuagatik; baina pozik aldi berean, zeure onena eman duzula dakizulako. Bideoan aipatu den bezala, zure lan horretan eragin handia izan dute zeure lagun taldeak, patroiak eta afizioak, hau da, irakasleak, familia eta gainerako lagunak. Inoiz ez zara bakarrik egon eta haiei esker ere bai, helmugara iritsi zara.
ZORIONAK TXAPELDUN!
Bide luze honetan, motxila bete duzula ziur gaude. Gauza berri asko ikasi dituzu ikasturtean zehar; eta, blog honetako argitalpenen bitartez, gutxienez, bestearen zapatetan jartzeko gaitasuna garatu izana espero dugu. Horrek, etorkizuneko elkarbizitzarako lagunduko zaitu, ziur izan. Egindako 67 sarreretan, balore asko landu ditugu eta hainbat gai jorratu ditugu: amodioa, autoestimua, elkarbizitza, aniztasuna, errespetua, kultura, ausardia, giza eskubideak, hezkidetza, berdintasuna... Ez da lan makala izan, oso hitz potoloak haiek guztiak eta gai horien inguruko hausnarketa sakonak egin ditugu elkarrekin. Plazer bat izan da guretzat hau guztia kudeatzea, are gehiago jakinda lerro hauetan idazten dugunari esker mundu hobea eraikitzen laguntzen ari garela, modu xumean izanda ere.
Ez dakigu zein nolako jarraipena izan dugun zugandik, baina gure aldetik ikasturte honetako balorazioa oso ona izan da. 2017ko irailetik hona, guztira, 116.000 bisitaldi inguru jaso ditu gure blogak, itzelezko datua izan da aurtengoa ere bai! Aipamen berezia egin nahi diogu maiatzean egindako LGTBfobiaren kontrako sarrerari, 6000 bisitaldi baino gehiago izan baititu. Hau marka hau!
ESKERRIK ASKO!
Eta gaur, ekainak 21, Europako musika eguna denez, ikasturtea hasi genuen moduan amaitu nahi dugu: musikarekin! Ekarpena, honetan ere bai Mireneren eskutik, kasualitatea ote? Eskerrik asko horrenbeste gauza polit erakusteagatik! Ikusi, abestu, dantzatu eta gozatu!
Atseden eta indarrak hartu hurrengo kapitulua idazteko! Ikusi arte!
Jakin dugu ikasle batzuk ez direla gailuen erabilera ona egiten ari, nahiz eta gai hau berria ez izan eta askotan jorratu izana. Horren ildora, azken egunotan entzun da komunikabideetan Frantzian telefonoak legez debekatuta egongo direla datorren ikasturtean eskola guztietan. Geure uste apalean, ez da neurri egokia, horrela ez baita arazoa akabatuko. Gailuekin sortzen dira arazoak, baina gailua bera ez da arazoa, haren erabilera desegokia baizik. Kontua da gailuek ez daukatela errurik, hau da, erabiltzen dituztenak ez daudela ondo hezituta erabilera egokian. Horretan jarri behar da indarra eta horregatik behin baino gehiagotan jorratu dugu gaia hemendik. Arazo bat konpontzeko, aurre egin behar zaio, eta horretarako arriskuak egon behar; baina laguntzarekin posiblea da berbideratzea.
Materiala ikertzen ibili gara eta zurekin partekatu nahi ditugun bideo batzuk topatu ditugu. Ez zaitugu beldurtu nahi, baina egia da agertzen diren egoerak nahiko errealak izan daitezkeela.
Has gaitezen lehenengoarekin:
Kontuz partekatzen duzun informazioarekin. Sare sozialetan ezer argitaratu baino lehen, pentsa ezazu ondo informazio hori nork ikus dezakeen eta benetan garrantzitsua den partekatzea... Gelditu zara une batez pentsatzen zertarako egiten dituzun publikazioak sare sozialetan? Zein helbururekin egiten duzu? Zerbait gertatuko litzateke ez bazenu egingo? Gure aholkua: argi ez badaukazu, hobe ez egitea...
Pasa gaitezen bigarren bideo honetara. Beharbada ikusita daukazun, Movistar entrepresaren iragarkia izan zelako. Badazpada ez duzun ikusi, ez dugu ezer aurreratuko. Ikus dezagun!
Ziur, gu bezala, zu ere bai zur eta lur gelditu zarela amaieran gertatzen denarekin eta ematen duten mezuarekin... Jakin badakizu ez duzula ezegazunekin hitz egin behar, ea adibide hau presente daukazun horrelako arazorik sahiesteko. Azken adibide hau ildo beretik doa, erne ikusi:
Ikaratuta, ezta? Hasieran aipatu dugun moduan, ez zaitugu izutu nahi baina erne egon behar duzu eta zaindu behar dituzu pantailaren beste aldean dauzkazun harremanak.
@amaiaarroyok Twitterren egindako ekarpena gehitu nahi dugu orain, mezuari puntu optimista emateko: IKTen erabilera positibo konstruktiboak azpimarratu beharko lirateke, hau da, IKTek kolaborazioa eta sormena sustatzeko ematen duten aukera, besteak beste. Ikasleei gauza txarrak soilik erakutsita, eredu onak alboratzen ditugu eta esperientzia positibo asko ere badaude.
Amaitu nahi dugu zuri laguntza eskaintzen. Ziur zeure ondoan nagusi asko dituzula, baina beharbada lotsatzen zara eta ez dakizu zelan edo nori eskatu laguntza. Ez dago txarto norbaitekin partekatzea gertatzen zaizuna edo salatzea ikusi duzun hori, baina hobe nagusi batekin egiten baduzu. Zure lagun batek entzungo dizu baina bere aholkuak, beharbada, ez dira zuzenenak izango; berak, zuk bezalako ikuspuntua izango duelako eta horrelako egoera batean hobe nagusi batengana jotzea, are gehiago profesionala izanik! Hona hemen zeuri zuzendutako doako zerbitzua:
ZeukEsan Euskadiko haurrei eta nerabeei zuzendutako laguntza-gunea da. ZeukEsan-ek laguntza emateko telefonoa eta web-orrialdea dauzka.
Alde batetik, ZeukEsan-en telefonoa, 116111, doakoa da eta guztiz anonimoa.
Bestetik, ZeukEsan web-orrialdea duzu eskura, eta blogak, gizarte-sareak, bideo kanala eta kontsulta-postontzi anonimoa ditu, telefonoz deitu ordez idatzi eta zer gertatzen zaizun kontatu nahi baldin baduzu ere.
Arazorik baduzu eta norbaitekin hitz egin behar baduzu; buruan "bueltaka" dabilzkizun gaiei buruz orientazioa edo aholkua behar baduzu; edo norbait beste norbaitez abusatzen ari dela ikusten baduzu (jazarpena, indarkeria edo bestelako erasoak)... deitu edo idatzi dezakezu.
Honen guztiaren atzean psikologoak eta gizarte-hezitzaileak daude, haurren eta nerabeen esparruan espezializatuak, beraz esku onetan zaude.
Jakin ezazu lasaitasun osoz deitu edo idatzi dezakezula, esku onetan egongo zara-eta. Badakite zein garrantzitsuak diren zure intimitatea, zure ideiak eta zure zalantzak. Arreta osoz hartu eta entzungo zaituzte, eta laguntzen saiatuko dira. Lagundu nahi dizute, besterik gabe!
Horregatik, laguntza behar baduzu: eskatu! Aprobetxatu aukera!
