MAIATZAK 17: LGTBFOBIAREN KONTRAKO NAZIOARTEKO EGUNA

Kaixo balorezale:

Aurten, berriro ere, maiatzaren 17ko Homofobia, Transfobia eta Bifobiaren aurkako Nazioarteko Egunaren berri ematera gatoz. Iaz azaldu genuen moduan, 1990eko maiatzaren 17an Munduko Osasun Erakundeak homosexualitatea gaixotasun mentaleen zerrenatik ezabatu zuelako ospatzen da.

Egun honetako helburu nagusia homosexualen, bisexualen eta transexualen kontrako diskriminazioa salatzeko balio duen ekintza mota guztiak koordinatzea da.

LGTBfobia aniztasun sexualarekiko jarrera diskriminatzailea da. Nahiz eta azken hamarkadan aurrerapausoak ematen ari diren bisibilizazioan, onarpen mailan eta lege berdintasunean tamalez, LGTB pertsonen kontrako uko egite, eraso, diskriminazio eta jazarpenak bizirik jarraitzen dira.

Eskoletan ere bai, ikasleen kontrako diskriminazioa ematen da: mehatxuak, orientazioaren inguruan hainbat iraintze, ez ikusiarena egitea… Jakina da bortizkeria psikologikoak autoestimuan duen eragina negatiboa dela, hori dena umilatzea da. Lan handia egiteke dago, baina gizarteko laguntza  eta inplikazioa ezinbestekoa da.

Badira beste hainbat portaera bortizkeriatzat jotzen ez direnak, baina ezinegona eta mina sortzen dituztenak. Adibidez, genero estereotipoei ez jarraitzeagatik entzuten diren txisteak edota esamesak. Hauek guztiak ere, bortizkeriatzat jotzen ditugu eta hemendik, ozen baino ozenago salatzen ditugu.

Pertsona guztien orientazio sexuala errespetatua izateko asmoz, gure erronka tolerantzian eta errespetuzko jarreretan oinarritutako harremanak gauzatzean datza; pertsonok aske eta libre eratu eta garatu gaitezen. Hori dela eta, geure mezua ahalik eta gehien zabaltzea eskatzen dizugu.

Jarraian bideo batzuk gai honekiko sentsibilizatzeko luzatu nahi dizugu. LGTB kolektiboaren barruan dauden pertsonen sentimenduak hainbat modutan adierazten dira. Esate baterako, Kantu Kolore taldearen kantu eder honek plazaratzen digun istorioa (Eskerrik asko, Patricia!):

Hurrengo bideo honek oso ondo kokatuko zaitu gaurko gaian eta, beharbada, ulertaraziko dizu LGTB kolektioaren pertsonek, guztiok bezala, sentimenduak dituztela, eta ez lituzkete ezkutatu beharko...

Hitzik gabeko bideo adierazgarri hau serio hartu izana espero dugu, gaurko gaiak eta LGTB kolektiboaren errealitateak behar duten seriotasuna eman behar diogulako. Bideo honen bitartez, errealitate honetarako hurbilketa egiteko balio izana espero dugu.

Jarraian, beste bideo bat luzatzen dizugu. Honetan beste mota bateko sentimenduak plazaratzen dira, homosexualen, transexualen eta bisexualen egoera gordina ikusiko dugu. Haien zapatetan kokatzeko balioko zaizulakoan gaude. Erne!

Amai dezagun abesten eta dantzatzen Gatiburen eskutik "Aske maitte, aske bizi" kantuarekin, amodioa librea delako errespeta dezagun maitatzeko edozein modu. Maitasuna dagoen lekuan ezin da minik egon, maitasunak ez dauka etiketarik!:

APIRILAK 2, EGUN URDINA

Kaixo balorazale:

Oporretan egon arren, tarte bat atera dugu autismoaren egun honetan. Iaz jada egunaren berri eman genizun eta horrekin batera hainbat datu. Aurten Gipuzkoako Marea Urdina izeneko talde baten egitasmoa ekartzen dizugu.

Gizartearen %5-ak ezgaitasunen bat du eta konkretuki %1-ak AUTISMOA du. Gizarteak pertsona hauen berri izan eta berauen gizarteratzean parte hartu dezan Marea Urdina antolatu da. Haien helburua gizartea autismoa duen pertsonen inguruan sensibilizatzea da, ez du inolako diru bilketa helbururik. Gipuzkoako kosta igeritan egingo dute bi etapetan eta erreleboka uztailaren 7an eta 8an, igerilari ezberdinak parte hartuz. Marea, ibilbidea igeritan izango da eta jendetza biltzeko asmoa dute. Urdina, autismoaren kolorea URDINA delako.

Jarraian grabatutako abestia luzatzen dizugu:

Amaitzeko, bideo labur bat partekatu nahi dizugu. Bertan oso ondo azaltzen da zelan sentitzen den ume autista bat eta bere erreakzioak estimuloz jositako mundu batean:

Errealidade hau apur bat hobeto ezagutzea eta ulertzea espero dugu.

Pazko astelehen ona izan!

AUTENTIKOAK

Kaixo balorazale!

Pasa den urtean eman genizun egun honen berri. Eta adibide anitz jarri genizkizun argi gera zedin Down Sindromedunak PERTSONAK direla.

Ba al dakizu zer den Down Sindromea? Definizioz, Down sindromea alterazio genetiko bat da, normalean 21. kromosoma bikotean ematen dena. Bikote horretan bi kromosoma izan beharrean, hiru kromosoma izaten dizutezte sindrome hau pairatzen duten pertsonek. 

Hurrengo irudian oso argi ikusten da alterazio hori:

Zerikusia izango du martxoak (3) 21ean izatea egun honek (21. kromosoma bikotean 3 izatea 2 izan beharrean)? Edo kasualitatea ote da...? Jarrai gaitezen ea hemendik erantzuna aurkitzen duzun, bestela iker ezazu!

Jarraitu baino lehen, argi utzi nahi dugu ez dela gaixotasuna. Ezaugarri zehatzak dituzte, besteak beste: 

• Garapen motrizean arazoak
• Koordinazioan eta mugimenduetan zailtasunak
• Atentzioa mantentzerako orduan zailtasunak
• Entzumen urritasuna zenbait kasutan
• Hizkuntzaren garapenean atzerapena
• Memorizaziorako zailtasunak
• Prozesu kognitiboak gauzatzeko zailtasunak
• Irudiak, soinuak baino hobeto prozesatzeko gaitsuna

Beharbada beste batzuei baino gehiago kostatu ahal zaie gauzak egitea, baina autentikoak dira, aurtengo sentsibilizazio kanpainak adierazten duen moduan. Haiek inork baino hobeto azaltzen dute nolakoak diren eta nola sentitzen diren hurrengo bideoan:

Oso egokia bideoari eta kanpainari eman dioten izenburua: autentikoak. Horrelakoak baitira. Baten bat ezagutzen baduzu ziur gaude ados egongo zarela; eta ez baduzu oraindik zorte hori izan, daukazunean honetaz guztiaz gogoratuko zarelakoan gaude.

Beste bide batetik baina honekin loturik, #DiferenteComoTu izeneko kanpainia heldu zaigu (eskerrik asko Leire!), eta luzatzen dizugu zeure zentruan martxan jar dezazun edo zeure etxean familiakoei proposa diezaiezun.

Ikusten duzunez ez da bat ere zaila, animatu zaitez martxoak 21ean galtzerdi desberdinak janzten eta bete ditzagun sare sozialak argazkiz PERTSONA hauen inklusioagatik!!

Amaitzeko, jarraian txertatzen dizugu EITBko #UrHanditan programak azaroan Down Sindromeari buruz eskainitako saioa. Denbora behar da, baina merezi du ikusteak hobeto ezagutzeko PERTSONA hauek:

Zenbat ikas dezakegun haiengandik... Autentikoak dira, eskerrik asko existitzeagatik!

OSTEGUN BELTZA

Kaixo balorezale,

Askotan idatzi dugu kirolari buruz eta, horren inguruan hausnartuz, hainbat balore plazaratu egin dira (solidaritatea, laguntasuna, umiltasuna, zintzotasuna...). Aste honetan, aldiz, beste ikuspegi batetik begiratu behar dugu kirolarekin lotuta dagoen egoera bat.

Bart, Athletic-ek Moskuko Spartak-en kontra jokatu zuen UEFAko Europa Leaguen. Astean zehar hainbat abisu egon dira zale errusiar extremisteei buruz eta beraien gaiztakeriak nolakoak diren ikusteko aukera anitz izan ditugu komunikabide guztietan, baita sare sozialetan ere. Oso zaila izan da ezer ez ikustea.

Herenegun, Bilboko bi ikastetxek, San Mamesetik gertu daudenez, eskolaz kanpoko ekintzak, eta baita klaseak ere, bertan behera uztea gomendatzen zuten, errusiar zaleekin arazoak egotekotan umeak arriskuan egon ez zitezen.

Hiriburuko kaleetan ehunka polizia ikusi ditugu, ia-ia borrokarako prest, zale euskaldunak zein errusiarrak gaiztoengandik babestu ahal izateko. Bai lagun, errusiarrak ere, astelehenetik gure artean hainbat Spartakzale egon baitira Bilboz gozatzen inori kalterik egin gabe eta, noski, beraien segurtasuna ere jokoan zegoen. Zergatik? Hemengo zalegoaren parte bat ere extremista delako eta borrokatu nahi omen zuen.

Gauzak horrela, partidua hurbildu ahala, iskanbilak sortu egin ziren Gasteizen zein Bilbon. Azkenean, partidua hasi baino lehen, irudi penagarri eta triste baino tristeagoak ikusi ziren. Su artifizialak, kolpeak, irainak... liskar galanta egon da San Mames alboan eta, partiduaren atsedenaldian, berri tristeena jaso genuen, Ertzain baten heriotza, hain zuzen. Antza, ez zen kolpe baten ondorioz izan, baina berdin dio. Zer dela eta pertsona bat hil behar da kirol ikuskizun batengatik?

Irudi hauek, guretzat, iraganeko irudiak ziren, baina ez da horrela. Kirol profesionala eta bertan sortzen den norgehiagoka aitzakia baino ez da liskartientzat eta hauek astero plazaratzen dute beraien krudeltasuna munduko bazter guztietan. Gauza bakarra dago argi: kirol ikuskizunetara borrokatzera doazenek ez dute kirola edo taldea maite, bakarrik indarkeria, eta gure zelaietatik eta kaleetatik at egon beharko ziren. Berdin dio errusiar, ingeles, espainol edo euskalduna izatea. Beraientzako lekurik ez da egon behar.

Pasa den urtean aurkeztu genizun moduan, indarkeriari txartel beltza atera behar zaio:

Orain, alde batera utziko dugu "kirola" eta gure nagusiengana hurbilduko gara.

Atzo goizean, estatuko hiriburu nagusietan, erretiratuak kalera atera ziren pentsio duinak eskatzera. Azken 5 urteotan, guztira, beraien bizizaria %1,25a baino ez da igo, hau da %0,25 urte bakoitzean.  IPCak (gauzen prezioa), aldiz, %2,1a igo da 2013tik hona, hori elektrizitatearen eta gasaren prezioa kontuan hartu gabe.
Zer esan nahi du honek? Demagun 2013an erretiratu batek 600€ko pentsioa zeukala. Bere pentsioa, gaur egun, 607,5€koa izango zen eta, noski, 7,5€k ez du ematen gauza guztien prezioen igoerak ordaintzeko.

Gure nagusiek gero eta pobreagoak direla salatu nahi dute eta bizitzaren prezioaren igoera bera beraien pentsioak izateko eskatzen dute.

Hemendik, gure solidaritatea eskaini nahi diegu nagusi guztiei. Ba al da posible, bizitza osoa lan egin eta gero, zergak ordaindu ondoren, hain pentsio baxuak izatea? Nola bizi daitezke gure aiton-amonak? Nork bermatzen ditu beraien eskubideak? Madrilgo gobernutik, gainera, irain bat jaso egin dute orain dela gutxi. Presidentearen hitzetan, bizitzan zehar aurreztu behar da jubilaziorako. Eta hori dio pentsionisten itsulapikoak, guztion artean bete dugun hori, bankuak eta entrepresa pribatuak salbatzeko husten duen bitartean. Hura bai komiko ona. 

Blog txiki honetatik omenaldia egin nahi diegu nagusiei. Zuek bai izan zaretela eredu aparta giza eta langileen eskubideak lortzeko borrokan. Zuen alde gaude. Gora nagusien borroka!

OTSAILAK 11, ZIENTZIAKO EMAKUMEAREN ETA NESKAREN NAZIOARTEKO EGUNA

Kaixo irakurle hori:

Asteburua da, bai; kanpoan hotz handia da, bai; eta ihauterietan gaude, bai. Aitzakia perfektuak  dira deskonektatzeko, baina ezin dugu. Jaia eta atsedena alde batera utziko ditugu une batez, gaurko eguna oso garrantzitsua baita blog honetan hainbat aldiz aldarrikatu dugun hezkidetza gaia jorratzeko. Horregatik eskatzen dizugu geure mezua zabaltzeko ahalik eta jende gehienari egun honetako informazioa helarazteko. Eskerrik asko!

Izan diren, izaten diren eta izango diren emakume zientzialarien Nazioarteko Eguna da gaur, hain zuzen. Iaz ere bai egun honen berri eman genizun, hemen daukazu informazioa.

Mundu global eta askotarikoan bizi gara, berdintasuna arlo askotan lortu gabe dagoen batean. Arduratu eta kezkatzen gaitu generoaren eta teknologiaren arteko etena. Hori dela eta, neska gazteak zientzian eta teknologian aritzeko garrantzia aldarrikatu nahi dugu zientziako emakume eta nesken nazioarteko egunean.

Lehen aipatu dugun moduan, aitzakiak aurkitu ahal dira gaur etxean gelditzeko; baina gai hau gero eta jende gehiagori kezkatzen zaioela ematen du, Oracle entitateak Bilbon antolatu dituen neskentzako ikastaroak topera daude. Geu han izango gara, nola ez! Hona hemen antolatutako ekintzetan parte hartzeko animatzeko bideoa:

Hemendik, eskerrak eman nahi dizkiogu Oracle 4 Girls delako ekimenari horrelako ekintzak antolatzeagatik eta geure neskei STEM-ei hurbiltzeko aukera emateagatik!

Amaitu baino lehen, albiste bat luzatu nahi dizugu ulertzeko zergatik den hain zaila emakumeon papera zientzia munduan. Erne entzun emandako datuak!

Datu lotsagarri eta kezkagarriak benetan! Ez duzu uste? Zailtasunak zailtasun ere, badira emakume zientzialariak, puntakoak. Horiek hartu beharko genituzke eredutzat etorkizuneko emakumeak motibatzeko.

Hurrengo loturetan informazioa eta eredu apartak aurkituko dituzu emakumearen papera zientzian gaiari buruz gehiago jakin nahi izanez gero:

Aintzindariak
Emakumeak zientziaren historian zehar
Las chicas son de ciencias (Eskerrik asko, Jone!)
Mujeres de la ciencia (Eskerrik asko, Jone!)
Iniciativa 11 de febrero

Normalean, inguru sozialak ez ditu berdin bultzatzen neskatoak eta mutikoak ikasketa zientifiko eta teknikoak aukeratzeko orduan. Erantzukizun eta eragin handia dauka hezkuntzak gai honetan, hezkidetza kontua ezin da bi egunetan bakarrik utzi, azaroak 25 eta martxoak 8 ospatzearekin batera. Eguneroko lana da eta guztioi dagokigu berdintasun hori bultzatzea arlo profesionalean zein pertsonalean. Ahaztu behar ditugu esteriotipoak eta etiketak, PERTSONAK gara eta guztiok aukera berdinak izateko eskubidea daukagu, generoa alde batera utzita behingoz!

GIZA ESKUBIDEEN NAZIOARTEKO EGUNA

Kaixo lagun!

Gaurko sarrerak bi aipamen bilduko ditu. Alde batetik, abenduak 5ean Nelson Mandelaren heriotzaren urteurrena izan zela eta, bestetik, gaurko Giza Eskubideen Nazioarteko Eguna.

Nelson Mandelarekin hasiko gara. Bakearen ikurra da inoiz ez dena hilko. Ezinezkoa da. Betiko geratuko da Historian. Maiuskulaz idazten den horretan. Handietan handienek lekua duten horretan. Askatasunaren eta duintasunaren ikurra da Mandela ere bai. Zapalduen borroka guztiek eta gatazken konponbiderako urratsek ispilua aurkitu dute Madiba handiaren bizitzan.

Jarraian "Invictus" (Menderaezin) olerkia, William Ernest Henleyk idatzia. Bideoa olerkiaren izen bereko filmaren zatia da. Nelson Mandela Hegoafrikako presidentea izan zenean gertatutako pentsaera aldaketaren inguruan datza. Entzun arretaz!

Honela dio olerkiak euskaraz:

"Estaltzen nauen gauetik kanpora,

Polotik polorako amildegia bezain beltza,

Legokeen edozein jainkori eskertuko nioke

Nire arima menderaezina dela eta.

Zirkunstantzien hatzapar ankerretan

Ez kexatu ezta ohiurik ez dut egin.

Zoriaren kolpeenpean

Nire buruak odola jario, baina ez da makurtzen.

Amorru eta malkozko leku honetatik haratago

Izuaren itzala berehalakoa da,

Eta halere urteen mehatxuak

Beldurrik gabe topatzen nau eta topatuko nau.

Atea zenbateko estua den,

Sententzia zenbateko zigorrez beteta dagoen berdin dio.

Nire patuaren nagusia naiz:

Nire arimaren kapitaina naiz."

Nelson Mandela azkenetarikoak izan zen, borrokatzaile hutsa! Eta berari esker Hego Afrikan arraza bereizkeriaren kontra borrokatu egin zen. Lotura estua dago Nelson Mandela eta Giza Eskubideen artean. Irudi honek oso ondo adierazten du (eskerrik asko Leire!!)

Iazko sarreran Giza Eskubideen azalpena eman genizun haibat daturekin. Aurten, bideo berria topatu dugu, bertan Giza Eskubideen Aldarrikapen Unibertsala biltzen da. Ikusi arretaz!!

Horrela ikusita, ez du ematen hain zaila denik. Baina, tamalez, errealitatea oso desberdina da eta gizaki askok ez dauzkate bermatuta... Giza eskubideak ezagutzea aurretiko eta ezinbesteko urratsa da pertsonen duintasuna errespetatzeko. Horregatik, urtero, abenduaren 10ean, Eusko Jaurlaritzak komunikabideen bidez sentsibilizazio-kanpaina bat garatzen du ahalik eta herritar gehienengana iristeko asmoz. Hona hemen  sentsibilizazio bi bideo:

Motzak izan arren oso adierazgarriak dira, oso ideia zehatzak eta argiak ematen dituzte.

Lehenengoak argi baino argiago uzten digu PERTSONAK (letra larriz, bai) garela guztiok, salbuespenik gabe! Blog honetan, maiz eta hainbat arlotan,  aldarrikatzen dugu hori. Beti pertsonen alde!

Bigarren bideoan hainbat arazo aipatzen dira: terrorismoa, indarkeria, bidegabekeria, desberdintasuna, lekualdaketa behartua, bazterkeria, arrazakeria, pobrezia... Horiei guztiei argia eman behar zaie konponbidea bilatzeko eta PERTSONA guztiak Giza Eskubideak bermatuta izateko.

HURRENGORA ARTE

Kaixo lagun!

Ikasturtearen azken eguna iritsi da, eta berarekin kapitulu honen amaierako puntua idazteko momentua. Batzuentzat etapa amaitzen da, beste batzuentzat maila soilik... Baina guztiontzat zerbaiten amaiera ailegatu da eta agur (edo gero arte...) esateko unea iritsi zaigu. Beharbada hurrengo irailean hemendik pasatuko zara, edo ez... auskalo!! Gu itzuliko garelakoan gaude, hori da gure asmoa behintzat!

Hurrengo irailean abentura berri batean abiatuko zara (baita gu ere!), zeure bizitzaren kapitulu berria idazten hasiko zara. Orain ixten duzun kapitulu honetan, hemen eta han ikasitako guztia praktikan jar dezazun espero dugu. Hala ere, ez duzu dena ikasi eta zailtasunak aurkituko dituzu, erronka berriak, beldur izango zara, baina aurrera jarraitu behar duzu beti. Ez utzi inoiz idazteari, ez egon geldirik, bizitza aurrera doa eta egoera guzti-guztietatik saiatu behar duzu zerbait ikasten, horrela esaten genuen erresilientziaz aritu ginenean, gogoratzen duzu?

Ikus dezazun zein azkar doan bizitza, hemen duzu oso adibide bikaina. Oso bideo motza da, beraz, zabaldu begiak eta erne egon!!

Aho bete hortz, ezta? Ba... aprobetxa ezazu aukera bakoitza, ez galdu denbora eta BIZI!!

Baina, zer da bizitzea? Nahi duguna egitea al da? Ondo pasatzea al da? Ziur gaude ezetz borobila eman duzula. Ikasturte osoan zehar ikasitakoa burura etorri zaizulakoan gaude. Errespetua, besteen zapatetan jartzea (enpatia), esfortzua, arazoei aurre egiteko estrategia onak erabiltzea (erresilientzia), laguntasuna edukitzea (babesa eman eta jaso), aurreiritziak alde batera uztea (arrazakeria, LGTB-fobia, etab.)... PERTSONAK IZATEA!! Orduak eman ditugu hainbat gairen hausnarketak eta gogoetak egiten, asko ikasi duzu. Gure ustez, bizitzari mamia guztiz ateratzeko, baloredun pertsonak izan behar dugu.

Gogoratzen zara gabonak eta gero, bi bide aurkeztu genizkizula? Bide luzea, zaila baina ona aukeratu zenuen. Orain bidean zaude, bide luzetik jarraitu behar duzu, gauzak primeran egiten oporretan ere bai!

Amaitzeko eta blog honi gero arte esateko, guk, azken atalean lagundu zaitugula, zuri espresuki bihotz-bihotzez eskaini nahi dizugu Mario Benedettiren olerki batekin egindako bideoa. Entzun ondo ematen dituen aholku guztiak, aurten hemendik landutako guztiarekin lotura estua baino estuagoa baitauka. Gustatzea eta gozatzea espero dugu:

Ondo segi balorezale, eta gogoratu: egiten dugunak isladatzen du gu geu garen hori!

Hurrengora arte!

MAIATZAK 17: LGTBFOBIAREN KONTRAKO NAZIOARTEKO EGUNA

Kaixo balorazale!

Zer dira sarreraren letra horiek?

Lesbiana
Gay
Transexuala
Bisexuala

Horrela ikusita, argiago duzu, ezta?

Gaur homofobia, transfobia eta bifobiaren aurkako nazioarteko eguna da. Maiatzaren 17an ospatzen da 1990. urteko egun horretan Osasunaren Mundu Erakundeak (OMS) gaixotasunen sailkapenen eskuliburutik kendu zuelako homosexualitatea. Bai, ondo ulertu duzu, duela 30 bat urte gaixotasuntzat hartzen zen LGTBa. Harrigarria benetan!

Duela gutxi Gazteen Euskal Behatotiak egindako ikerketa baten arabera, Euskadiko gazteak gero eta toleranteagoak dira. Izan ere, 15 eta 29 urte bitarteko gazteen % 92a ez dago ados “funtsean homosexualitatea gaixotasun bat da eta horrela tratatu behar da” dioen esaldiarekin; soilik % 3a azaldu da ados esaldi horrekin. Adostasuna jaitsi egin da azken bost urteotan, 2012an % 6koa baitzen.

Gure uste apalean, eskolak eragin handia dauka horrelako kontuetan, horregatik gaude hemen, materialak luzatzen eta etorkizunaren begiradak zabalarazi nahian. Txiki txikitatik landu daiteke LGTB gaia, horretarako ipuinak daude eta normaltasuna ematen bazaio kontuari, begirada zabaleko pertsonak heziko ditugu, pertsona toleranteak alegia. Lotura honetan ipuin batzuk luzatzen dizugu, nahiz eta umeentzat izan asko ikas daiteke haiengandik!!

Hasiko gara transexualitatea primeran azaltzen duen 2005eko dokumental finlandiarrarekin. Protagonista, 11 urteko neska transexuala da eta berak oso modu argi eta garbian azaltzen du zer den eta zer sentitzen duen. Luzetxoa da (17 minutu) baina uste dugu merezi duela gauza asko ikas daitekeelako.

Ziur gaude gauza berri asko ikasi dituzula, ezta? Zuk zeuk galdetuko zenizkiokeenak agertu direla eta zalantza asko argitu zaizkizula suposatzen dugu. Ekarpen hau zure begirada zabaltzeko asmoarekin izan da. Lortu izana espero dugu!

Jarraian maiatzak 17rako Bizkaiko Foru Aldundiak egindako iragarkia txertatu dugu, irain homofobo, transfobo eta lesbofoboak salatzen dituena. Horretaz aparte, datu interesgarriak ematen ditu baina pena da euskaraz ez egotea, nahiko lotsagarria gure ustez... Beraz, aprobetxatu nahi dugu salatzeko entidade publiko baten iragarkia euskaraz ez egotea. Gorrotoaren hizkuntza ez erabiltzeko animatzen gaituzte, baina hobe geure hizkuntzan egingo balute. 

Aurreko bideoan aipatzen diren datuak harrigarriak dira, baina hurrengoarenak ez dira atzean gelditzen... Ez dago txarto jakitea zer dagoen munduan eta zelako egoerak existitzen diren! Adi egon:

XXI. mendean Giza Eskubideak bermatzen ez dituen herrialdeak egotea lotsagarria da. Espero zenuen horrelakorik existitzea? Zer izan da gehien harritu zaituena? Guk egiten dugun hausnarketa da LGTBak PERTSONAK direla, hori baino ez. Eta pertsonen trataera merezi dutela, hori baino ez... 

ETIKETAK

Kaixo balorezale hori!

Sarreraren izenburua irakurrita eta ondorengo bideoan ikusiko duzuna kontuan izanik, gaurko sarrera hau zertan datzan hipotesiak bota. Ziur barregura eragingo dizula baina ez ahaztu lotura bilatu behar duzula!

Ziur bonbila piztu zaizula eta asmatu egin duzula aurreiritzien inguruan dela gaurko sarrera. Pasa den asteko arrazakeria eta xenofobiaren kontrako nazioareteko egunarekin ere lotura handia dauka. 

Zergatik jarri etiketa bat geure azalaren kolore berdina ez dutenei? Azken finean, ez al dira gizakiak, guztiok bezala? Zerbait irabazten da? Gure ustez, hori egitean mundu guztiak galdu egiten du. Hala eta guztiz, tamalez, gaur egun oraindik ere, aurreiritziz beterik gaude eta etiketa gehiegi jartzen ditugu. 

Baina itxaropena ez dugu galduko eta iritsiko da momentua etiketak desagertzen direnean... Hori da gure helburua hemen argitaratzen dugun guztiarekin: arazo sozialez kontzientzia hartzea txikitatik ahal den neurrian adinaren arabera.

Aurreko guztia lortzeko, beti gabiltza bide batetik edo bestetik gure eskuetara iristen diren bideoak aztertzen. Beharbada hurrengoa sare sozialetan ikusi duzu jada, baina guk euskaratu egin dugu. Etiketen kontuaren inguruaz da. Izatez, Danimarkako telebista baten iragarkia da, adierazi nahi duena etiketak alde batera utzi beharko genituzkeela, guztiok pertsonak garelako. 

Ziur gaude aurpegiren bat agertu dela espero ez zenuen lekuan, baina... zergatik espero dugu? Zergatik epaitu informaziorik izan baino lehen? Horietatik, pentsa ezazu zein izan den gehien harritu zaituena. Zergatik ote? Ez al dugu esan guztiok pertsonak garela? Ikusmira zabaldu eta epaitu gabe begiratu beharko genuke mundu hobea izateko.

Amaitzeko Gatibu taldearen azken diskaren lehenengo abestia luzatzen dizugu. Oso aproposa da eta guztiz bat dator gaurko sarrera honetan landu dugunarekin. Entzun arretaz letra eta gozatu!

Ba hori, ez naizu epaitu nire itxuragaitik...

DOWN SINDROMEAREN NAZIOARTEKO EGUNA

Kaixo balorezale hori!

Sarreraren izenak dioen moduan, gaur Down sindromearen nazioarteko eguna dugu. Kontuan izan nahi dugu egun hau, sindrome hau daukaten pertsonak oso bereziak direlako. Baina ez fisikoki desberdinak izateagatik, edota astiroago erantzuten dutelako... Hurrengo bideoak azaltzen digu zergatik diren bereziak, irakurri arretaz!

Azken finean, gu bezalako pertsonak izaten dira eta ez daude askok uste duten bezain mugaturik. Eredu aparta ikusiko dugu jarraian:

Ziur gaude zu ere harrituko zinatekela horrelako lan-elkarrizketa batean. Baina mezu bat argi baino argiago izan behar dugu: pertsonak baino ez dira. Down sindromea daukatenek, besteok baino aberatsagoak dira, kromosoma bat gehiago daukatelako.

Beste eredu batekin amaitu nahi dugu omenalditxo xume hau, Frantzian gertatutako duela gutxiko gertaera. Erne!

Ikusten duzunez, gainditze eredu aparta dugu Mélanie. Zorionak neska, lortu duzu eta!

Ez dugu sarrera hau bukatu nahi pertsona hauekin lan egiten duten erakundeen eta pertsonen lana eskertu gabe. Zuek ere bitxiak zarete.

Eta zu, balorezale hori, prest zaude Down sindromedun pertsonei beste modu batean begiratzeko? Noski! Gogoratu Antoine de St.-Exupériren Printze Txikiak zioena: "Garrantzitsuena ikustezina da, bakarrik ikus daiteke bihotzaren begiekin". Ikus dezagun guztiok bihotzarekin!

EREDU APARTAK

Kaixo guztioi!

Pasa den asteko "gonbidatuak" eredu adoretsu apartak izan ziren biak eta norbere gainditze eredu bikainak ere bai, baina noski, ez dira bakarrak.

Hurrengo bideoaren protagonista Mark Goffeney dugu. Beharbada ezagutzen duzu musikari honen berezitasuna, El Hormiguero telesaioan agertu baitzen iaz. Ez baduzu ezagutzen, disfruta ezazu hurrengo bideoekin.

Lehenengoan Mark Kontserbatorioko ikasleei masterclass bat ematera joaten zaie. Ikasle batzuen ezpainetan argi eta garbi isladatzen dira harridura eta lilura hitzak. Beste batzuk aho bete hortz geratzen dira... Besterik gabe, ikus dezagun zergatik!

Zure aurpegian ere bai Markek eragindako harridura isladatu dela ziur gaude, baina oraindik ez du bukatu... El Hormigueroko zati txiki bat ikusiko dugu eta badakigu oraindik gehiago ere harrituko zarela.

Espero zenuen munduan holako kitarjolerik existitzea? Zure ustez, Markek bere burua onartu al du? Nola hartu du bere "ezintasuna"? Zer egin du aurrera egiteko?


El Hormiguero irten zen beste eredu bat (eskerrik asko Leire M.!):

Berriz ere txundituta geratu zarela somatzen dugu...

Baina ez da guztia bukatu, oraingo ereduak txapela kentzeko modukoak ere bai. Protagonista hauek ez dira musikoak, kirolariak baizik, nahiz eta lehenengo itxuran ez diruditen... Askotan, ikusten dugunak engainatzen gaitu, bestela ikusi zer gertatzen den hurrengo bideoan!

Fijatu zara zelako begiradak dauden kirolari paralinpiko hauek agertzen diren tokietan? Eta kirolari ekiten diotenean eta besteek espero ez dutena ikustean? Ez du ematen protagonistek ikusi dituztenik harridura aurpegi eta keinu horiek, baina, ikustekotan, zelan sentituko ziren? Nola lortu dute horraino heltzea elbarriak izanik?

Gaurko sarrerako ereduak ikusita hitzik gabe geratu arren, gutxienez pentsaraztea eta hemendik aurrera kanpoko itxuraz ez fidatzea espero dugu...

URTARRILAK 15: MARTIN LUTHER KING JR-EN EGUNA

Kaixo lagun hori!

Baloreak lantzen dugun blog honetan, gaurko eguna ezin zitzaigun eskapatu, Martin Luther King eguna hain zuzen. Balorezale amorratua izan zen eta horregatik omenalditxoa egin nahi diogu hemendik gaur, nor zen gizon ospetsu hau ezagutarazi nahi dugu.

Martin Luther King ekintzaile afroamerikarrak boto-eskubidearen alde, diskriminazioaren kontra eta beste hainbat oinarrizko eskubideren alde martxak antolatu zituen. Baina batez ere bere "I Have a Dream" (Amets bat dut) diskurtsoagatik da famatua.

Afroamerikarrek AEBetan jasaten zuten diskriminazioa salatu zuen Luther Kingek, eta afroamerikarren eskubide zibilen alde lan handia egin zuen bizi osoan zehar. Hala ere, batez ere Washingtongo martxan egin zuen hitzaldiagatik da ezaguna. Izan ere, hitzaldi horrek bultzada handia eman zion afroamerikarren eskubide zibilen aldeko iraultzari.

‘I have a dream’ esaldia ez esateko aholkatu zioten Luther Kingi, aurretik askotan errepikatu zuelakoan. Aste horretan bertan, Chicagon, amets bat zuela azpimarratu zuen Luther Kingek milaka jarraitzaileren aurrean.Hitzaldia Washingtoneko hotel batean prestatu zuen.

Hurrengo egunari begira dokumentu bat idatzi zuen, eta bertan ez zen bere esaldi famatuena agertzen. Hala ere, inprobisazioaren alde egin eta diskurtsoa goitik behera aldatzea erabaki zuen.

Egun horretan ere entzuleen txaloak jaso zituen, ez bakarrik esaldi ospetsu horrengatik, baita 16 minutuko hitzaldian zehar erabilitako beste hainbat esaldirengatik ere.

FBI Luther Kingen atzetik ibili zen urte horietan: “komunistekin” ustez izan zituen harremanak aztertu zituzten, eta Luther King “AEBetako ekintzaile beltz arriskutsuena eta eraginkorrena” zela esan zuten.

1964. urtean, Bakearen Nobel Saria eman zioten Luther Kingi.

1968. urtean hil zuten, Memphisen, tiroz, martxa batean parte hartu aurretik. 

Esaldi ederrak utzi zituen Martinek, hona hemen lagin txikia:

Esanguratsuak benetan!!

Besterik gabe, aste ona izan!

ELKARREKIN EGOERA TXARREI AURRE EGITEN

Kaixo irakurle hori!

Pasa den astean ipuin baten bitartez ikasi genuen autoestimuaren edo, beste modu batean esanda, gure burua maitatzearen garrantzia beste batzuen jarrera desegokiei aurre egiteko.

Gaur beste jarduera bat proposatu nahi dizugu. Ikus dezagun bideoa:

Suediako iragarki hau ikusi ostean ideia asko etortzen zaizkigu burura baina zureak jakin nahi ditugu. Horretarako galdera batzuk uzten dizkizugu: 

• Zer datorkizu burura zuri? 
• Uste duzu txano laranjaduna ausarta dela? 
• Egingo ote zuen gauza bera bakarrik balego?
• Nor da ausartaren papera jokatzen duena?
• Inoiz sentitu zara "ilegorri"? 
• Zelan konpondu zenuen? 
• Ilea tintatzen duenaren laguntza bezala jaso zenuen? 
• Zer deritzozu bere ekimenari? 
• Jokatuko zinateke berdin horrelako arazo baten aurrean?
• Batzuk ez dute ezer egin, ez alde ez kontra. Zer deritzozu haien jarrerari?...

Ikusten duzunez hausnarketa dexente etortzen zaigu burura... Beharbada galdera guztien erantzuna ez daukazu, baina gogoeta bat luzatu nahi dizugu: 

Oso erraza da besteak mintzea. Oso poteretsu senti gaitezke. Besteak baino hobeak garela pentsa dezakegu. Baina, geure bizitzan aurrera joan ahala, konturatuko gara guztiz kontrakoa dela. Poteretsuagoa, hobea, zoriontsuagoa eta maitatuagoa sentitzen da besteak zaintzen dituena.

Izan gaitezen ilegorriagoak!

Hurrengo bideoaren protagonistak esku-jolas baten pertsonaiak dira, ziurrenik oso ezagunak zuretzat: Harri, Orri eta Ar. Ez dugu galderarik egingo aldez aurretik.

Erne egon bideoari:

Argi dago kanpoko itxuraz ezin zarela fidatu. Batzuetan laguntzat dituzunak ez dute erantzuten behar bezala eta, aitzitik, maiz, espero ez duzun pertsonengan altxorrik politenak topa ditzakezu eta laguntasunik politenak sor daitezke.

Baina, zer nolako lotura daukate bi bideoek? Guk ikusitako hiru ideia nagusi plazaratuko dizkizugu: 

Batetik adierazten digute askotan guk bakarrik ezin diegula egoera zailei aurre egin, baina besteen laguntzarekin dena izaten dela posiblea, are gehiago besteek gugan sinesten dutela sentitzen badugu. 

Bestetik ikusten dugu "desberdina" dena beti izaten dela ahulena, Maddiri gertatzen zitzaion moduan... Eta horretaz baliatzen dira erasotzaileak. Ausart sentitzen dira, baina koldarrak direla adierazten dute ahulagoak erasotzen. Ez dira ausartzen haiek baino ezagunagoak mehatxatzen edo txarto tratatzen,ez... 

Eta azkenengo ideia: nahiz eta hasiera batean pertsonaia ahulak bakarrik daudela iruditu, amaieran ez da horrela eta ikustarazten digute beti beti dagoela norbait laguntzeko prest.

Ziur gaude zuri beste ideiaren bat ere bai bururatuko zaizula. Animatu zaitez elkarbanatzen besteokin!

Amaitzeko argi utzi nahi dugu hurrengo ideia: ingurukoen laguntza eta konfidantzarekin dena izan daiteke posiblea! Hortaz, laguntza eman eta mezu baikorrak adierazi ondokoak babestuak eta maitatuak senti daitezen, eta horrela egoera latzak eramangarriago bihurtuko dira.

EZINDUEN NAZIOARTEKO EGUNA

Kaixo berriro ere:

Duela gutxi enteratu gara gaur ere Ezinduen Nazioarteko Eguna dela. Esfortzu handia egiten dute egunero pertsona hauek, hori dela eta sarrera berezia dedikatzea erabaki dugu.

Egun honetan ezagutzera eman nahi dira ezinduek besteak bezalaxe bizitzeko dituzten eragozpenak, baita ezinduak gizartean, politikan, ekonomian eta kulturan txertatzeko burutzen diren ekintzak ere.

Jarraian duzun bideoak Gipuzkoako Gureak egina da, merkatu lehiakorretan zerbitzu integrala eskaintzen duen enpresa taldea. Oso ondo azaltzen du ezinduak besteok bezalakoak direla. Erne!!

Hurrengo bideoak berez hitz egiten du, horregatik ez diogu sarrerarik egingo. Zabaldu begiak, ziur gaude ez zaituela hotz eta motz utziko, eta bihotza ikutuko dizula:

Hitz gutxirekin, nahiko adierazgarria da bideoa. Gauza handirik ez dago komentatzeko baina bai gogoeta pertsonalerako... 

Ikus dezagun desberdintasuna haur txikien begiekin!!

Bideo biak ikusi ostean hurrengo gogoetak datozkigu burura; horrelakoak ikusi arte ez gara ohartzen zelako zortea gurea, eskertzekoa benetan... Zenbat daukagun ikasteko eta baloratzeko!

AZAL GUZTIAK BALIO HANDIKOAK DIRA

Kaixo balorezaleok:

Gaurko sarreran ez dugu aurkezpenik egingo. Bideo batekin hasiko gara zuzenean. Oso motza da eta ikusten duzun bitartean, pentsa ezazu zerekin egon daitekeen lotuta, kontuan izanik blog honetan argitaratzen ditugun sarrerak giza-baloreekin zerikusia dutela...

Erne egon!!

Bideoa ikusita, Eroskiri publizitatea egiteko ekarri dugula uste al duzu? Ba ez! Orduan, zer nahi dugu lortu bideo honekin?

Azter dezagun bideoa: "Eroskiren helburua: zero hondakin" oso ondo dago, horrekin guztiz bat gatoz. Baina besteak bezalakoak badira barazki eta fruta horiek, zergatik jaitsi behar zaie prezioa? Zergatik jendeak ez ditu erosten? Erantzuna tristea da, jendeak kanpoko itxurari garrantzi handia ematen diolako.

Baina hau ez da bakarrik gertatzen jakiekin. Gure gizartean, tamalez, kanpotik nolakoa zaren askoz garrantzitsuagoa da nor zaren baino. Aspalditik ikusi dugu nola emakumezkoak argalak izan behar diren edo gizonezkoak gihartsuak, nola emakumezkoek depilazioa jasan behar duten, ilea tintatu edo makillatu behar diren eder egoteko... Zorionez mundu guztiak ez du amore ematen eta kanpotik nolakoa den onartzen eta defendatzen du.

AEBetako Idaho estatuko Boise hirian bizi da Amy, hurrengo bideoaren protagonista. Bere gorputza nolakoa zen onartzeko arazoak izan zituen Amyk. Oso ibilbide luzea egin du eta azken geltokia hiri horretako merkatu batean gertatzen da. Ikus dezagun zer egiten duen eta nolako erantzuna jasotzen duen jendearengandik...

Zer deritzozu Amyren ekintzari? Zer nolako erantzuna izango zenuke zuk horrelako pertsona bat kalean topatuz gero? Bihotza marrazteaz aparte, besterik idatziko zenioke zuk? Zer?

Hemendik zorionik beroenak eta eskerrik asko handia luzatu nahi dizkiogu Amyri horren ausarta izateagatik eta jende askori lezioa emateagatik, han ikusteko aukera izan zutenei eta bideoaren bitartez iritsi zaigunoi ere bai.

Bideoak eta egoerak aztertu ondoren, zure ustez kanpoko itxura garrantzitsua da? Noraino? Espero dugu ikuspuntu desberdin batetik ikustea orain. Eta horrela ez bada, gutxienez gaiaz hausnar dezazun.

Hurrengo arte!

PERTSONA BEREZIAK

Kaixo irakurleok!

Gure bizitzan, maiz, guretzako oso garrantzitsuak diren pertsonak topatzen ditugu. Jaio garenean familia berri eta oso bat daukagu gure zain eta denek ezagutu nahi gaituzte: ama, aita, anai-arrebak, izeko-osabak, aitona-amonak... Geroago, parkean edota haurtzaindegian, lagun berriak ezagutzen ditugu, normalean, gu bezalakoak direnak. Eta horrela, txiri-txiri, eskolara heltzen gara, pozaren pozez.

Baina noizean behin, planetak lerrokatzen dira eta gauza paregabea gertatzen zaigu. Pertsona berezi bat ezagutzen dugu eta, orduan, dena aldatzen da eta gure bizitza ez da berriro bera izango. Aldaketa betirako da eta gure esku dago horri aurre egiteko modua. Guk erabaki behar dugu nola hurbildu pertsona berezi horrengana.

Sarreratxo horrekin beharbada ez dago oso argi zer den landu nahi duguna gaurko post-arekin; baina hurrengo bideoa arretaz entzunez, ziur asmatuko duzuela nondik doan kontua eta zein den luzatu nahi dugun mezua.

Ikus dezagun nor den Lorenzo eta zer gertatzen zaion...

Jarraian hausnarketarako galdera batzuk plazaratzen dizkizuegu:

Ume berezia al da Lorenzo, zertan nabaritzen zaio? Edozein izan daiteke Lorenzo? Zergatik? Zer egin genezake geuk laguntzeko Lorenzori? Lorenzori ontzia behar bezala eramaten laguntzen diona, nor izan daiteke? Irakaslea, gurasoa, laguna, edozein pertsona...?

Ez dakigu zuen bizitzan "Lorenzo"rik ezagutzen duzuen, baina ziur gaude noizbait topatuko duzuela. Tokatzen zaizuenean, suertatu diren hausnarketak baliogarri izanak espero dugu egoerari behar bezala aurre egiteko.

Amaitzeko, hitzik gabe utzi gaituen "Oparia" izeneko laburmetraia. Ziurrenik, hasieran ez diozue lotura handirik ikusiko, baina... aurrerago zentzua aurkituko diozue eta ulertuko duzue zergatik ekarri nahi izan dugun. Erne egon!!

Pentsatzen laguntzeko galdera batzuk: zer nolako lotura daukate bi bideoek? Antzekotasunik aurkitzen diezue edukinean? Esan genezake ume horrek ontzia daukala?

Orain, ikasitako guztia hausnartzeko eta praktikan jartzeko garaia da.

Datorren astera arte!