SID: SAFER INTERNET DAY

Kaixo jarraitzaile hori!

Internet seguruaren eguna dugu gaur, otsailak 7. Aurtengo kanpainak eskatzen du guztion kolaborazioa internet seguruagoa izan dadin guztiontzat, baina batez ere ume eta gazteentzat. Ekintza asko burutuko dira mundu mailan egun honetan segurtasuna bultzatzeko.

Baina, egun bateko kontua al da soilik? Gure ustez, ez; horregatik sakonago landu nahi dugu gaia.

Duela gutxi, Gabonetan, Euskaltelek hitzarmen bat eskaini zigun iragarki batean. Bertan, 12 betebehar biltzen dira mugikorrari erabilera egokia emanez. Azter dezagun iragarkian azaltzen digutena!

Erabilera egokia izateko aholku jakintsuak entzun ditugunak! Ados al zaude guztiekin? Baten bat baztertuko zenuke? Besterik bururazen al zaizu? Erabiltzaile berriek soilik hartu behar dituzte kontuan? Telefono mugikorra izanez gero, hausnartu zeuk egindako erabileraz iragarkian ikusitako aholkuak kontuan izanik, zelakoa da? Ohituraren bat aldatu beharko zenuke?

Telefono mugikorraren erabileraren eredu bat ikusiko dugu hurrengo bideoan. Informazio-trukea garatuko da. Arreta jarri hori modu eraikitzaile batean egiten duten edota arduragabekeriaz ere erabiltzen dituzten:





Bideoko protagonistek beren egunerokoan teknologia berriak erabiltzen dituzte, sare sozialez egiten duten erabilerarekin bat egiten duzu? Ekintza arriskutsurik hauteman duzu? Sare sozialak modu desegokian erabiliz gero arazorik izan dezakegu? Sare sozialen erabilera desegokiaren ondorioz sortu den arazo bat larria izan daiteke, zure ustez?

Esukaltelek emandako aholkuak jarraitzen dituzte? Argazkiak bidaltzea oso ondo dago, edota egiteko dituzten zereginei buruzko informazioa bildu lankidetzan jarduteko. Baina, arduragabekeriaz ere jokatzen dute: egokiak ez diren argazkiak bidali dituzte, hirugarrenei buruzko informazioa bidali dute haien baimenik gabe, iraindu, mehatxu egin edo hirugarrenei jazarri...

Teknologia berriak eta sare sozialak arduragabekeriaz erabiltzeak askotariko arazoak sor ditzake. Dakizunez, mundu birtualean, izugarri azkar zabaltzen dira gure ekintzak; ekintza horiek jende askorekin partekatzen dira, eta, horrez gain, sarean garatzen den ekintza bakoitzak ezabatu ezin den aztarna bat uzten duela kontuan izan behar duzu.

Orain telefono mobilaren erabileratik, interneteko erabilerara emango dugu pausoa. Ziur gaude irakurleetariko gehiengo batek smartphone-a izango duela. Ba al dakizu orokorrean oso etekina txikia ateratzen zaiola patrikan gordetzen dugun ordenagailu txiki horri? Askok sare sozialak baino ez dituzte erabiltzen. Pena handia da, asko eta asko ikas daitekelako gailu txiki horiekin. Ordenagailu bat antzera dabil eta ez dakigu behar bezala daukan zuku guztia ateratzen. Baina hori norbere eskuetan dago, jakinminak bultzatu behar zaitu ezagutzen esku artean daukazuna.

Jarraian txertatutako bideoa Zumaiako Maria eta Jose ikastetxeko 5. mailako ikasleek egina da, "Klik" izenburua dauka. Aholku batzuk ematen dituzte oso era originalean, erne egon ea zerbait berri ikasten duzun!

Ziuraski aipatutako erabilera asko ezagutzen zenituela eta ordenagailu edo tabletarekin egiten duzun moduan, berdin egin dezakezu telefono mugikorrarekin. Argi izan behar duzu bata zein bestea erabiltzean, beti ager daitezkela saihestu behar dituzun arriskuak eta zalantzarik baduzu, jo ezazu nagusi batengana laguntza bila.

Orain apur bat urrunago joko dugu galdera batez: inoiz publikatu duzu zeure argazkiren bat interneten? Ikus dezagun hurrengo bideoa, Azkorri ikastetxeko DBHko 3. mailako ikasleek egina da. Amaitu ondoren, azalpen handirik eman gabe, ulertuko duzu zergatik galdetu dizugun hori:

Ulertzen duzu zergatik egin dizugun galdera hori lehen? interneten argitaratzen den informazioa zeure onerako edo txarrerako jokatu ahal du.

Zuk zeuk soilik jakin dezakezu zelako erabilera egiten duzun telefono mugikorrarekin, ordenagailuarekin edota tabletarekin. Sarrera honen asmoa zure ikuspuntua zabaltzea da zure segurtasuna bermatzeko. Ez izan inozo eta, Interneten ere, zaindu zure burua!

IEUP!

Kaixo!

Gaur otsailak 4a, Agate Deunaren bezperan, makilak hartuta, lurra esnatuko dugu Euskal Herriko auzo eta herri askotan. Aintzinako ohitura da. Agate deuna gazteen babeslea dela esaten da, horregatik kaleetatik abesten doazenak, gazteak izaten ohi dira. 

Baina, zein da Agate Deunaren ospakizunaren jatorria?

Agate 251. urteko otsailaren 5ean bularrak moztu zizkioten emakume siziliarra zen, eta haren historia gogoratuko dugu berriro gure herriko kaleetan. Sizilian jaio zen Agate 230ean. Neska ederra omen zen, eta Siziliako Quinciano gobernadoreak berarekin ezkondu nahi zuen. Baina Agedak kristautasunean fede itsua zuen, eta ez zuen onartu gobernadorearen proposamena. Quincianori ez zitzaion gustatu haren erantzuna eta kartzelan sartu zuen, eta bertan torturatu egin zuen; bularrak moztu zizkioten, eta hil egin zen 21 urteko neska gaztea. Agate Deuna mendebaldeko lehengotariko birjina-martiria da. 

Euskal Herrian Santa Ageda ospatzen dugu, Martiri askorekin gertatu izan ohi den bezala, Agate Deuna ere Euskal Herriko zaindari egin baitzuten. Herritarrak eta taldeak santa-eskean kalera ateratzen dira neska gazte siziliarraren ohoretan koplak eta bertsoak kantatzera; kopla edo bertso horien bidez Agateren bizitza kontatzen da, eta kantua abestuko den etxeko senideei zuzendutako bertsoak ere izaten dira.

Gaur egun, jaiak kutsu erlijiosoa eduki arren, bere jatorria guztiz paganoa da eta makilak astintzen ziren ama lurra esnatzeko nahian neguko solstizioaren ondoren, laster udaberria etorriko zelako.

Normalean iluntzean ateratzen da, ikusi ahal izateko faroltxo bat ateratzen da kandel bat piztuta barruan.

Guk, gaur egun, euskaraz abesten ditugu Agate Deunaren koplak, bertsio desberdinak entzun daitezke lekutik lekura. Euskal Herriko hainbat lekutan, aintzinean, gazteleraz ere abesten ziren. Jarraian, hemendik gertuko bertsio bitxia luzatzen dizugu, Sestaokoa hain zuzen ere, 93 urteko emakume batek abestuta.

IEUP!!!

OTSAILAK 4, MINBIZIAREN AURKAKO NAZIOARTEKO EGUNA

Kaixo berriz ere!

Lehengo sarrera tradizioari buruz izan da eta oraingoa ez da hain atsegina izango, minbiziaren aurkako nazioarteko eguna dela jakinarazi nahi baitizugu. Baloreak lantzen ditugu blog honen bitartez, horregatik gaixotasun hau pairatzen dutenei eta haien ondoan daudenei omenalditxoa egin nahi diegu: eutsi goiari txapeldunak!!

Minbiziak aurpegi asko ditu, zoritxarrez, baina gaur, otsailak 4, Osasunerako Munduko Erakundeak (OME) minbiziaren aurkako nazioarteko eguna ezarrita dauka. 

Geure helburua, gaixoekin eta haien ondokoekin solidarizatzeaz aparte, minbiziak gero eta eragin handiagoa duenez, kontzientziazioa eta sentsibilizazioa bultzatzea da. Gero eta kasu gehiago erregistratzen dira, horregatik prebentzioa eta detekzio goiztiarra funtsezkoak dira minbizi-kasuen gorakada saihesteko. Nazio Batuen Erakundeak (NBE) ohar baten bidez jakinarazi duenez, minbizi-kasuen % 60 Afrikan, Asian eta Amerikan (erdialdean zein hegoaldean) detektatzen dira. Hala, minbiziak eraginda nazioartean gertatzen diren heriotzen % 70 herrialde horietan izaten dira, besteak beste, detekzio goiztiarra nabari atzeratu egiten delako eta gaixotasunari aurre egiteko sendagaiek prezio altuegia dutelako.

Minbiziaren Aurkako Nazioarteko Eguna gogoeta egiteko aukera paregabea da, eta batik bat, minbiziari aurre egiteko norberak zer egin dezakeen pentsatzeko. “Elkarrekin lor dezakegu. Nik ere lor dezaket” lelopean, nazioarteko kanpainak “pentsatzeko, konpromisoa hatzeko eta hori gauzatzeko” deia luzatzen die herritarrei zein kolektiboei ere. “Guztioi eragiten digun gaitza izanik, pertsona orok neurriak har ditzake gaixotasunaren eragina murrizteko”, esan du NBEk.

Ez dugu topatu euskal erakundeek argitaratutako kanpainarik, horregatik luzatzen dizkizugu gazteleraz eta ingeleraz topatutako hauek: 

ONUk gogora ekarri duenez, minbizia zelulen alterazio genetikoaren ondorioz sortzen da. Batzuetan organo jakin batean gera daiteke, baina besteetan gorputzeko organoetara hedatzen da. Oinarrizko jarraibideak jarraituz (tabakorik ez kontsumitzea) minbizia kasu gehienak saihestu daitezke. Gainera, egungo tratamendu askok (kimioterapiak, erradioterapiak edota ebakuntzak) gaixotasun horri aurre egiten laguntzen dute, bereziki goiz detektatzen bada.

Minbizi motei dagokienez, biriketakoa, heste lodikoa, gibelekoa, biriketakoa eta bularrekoa dira hilkortasun-tasa handiena dutenak. OMEaren iritziz, minbizien % 30 saihets daiteke erretzeari utzita, ariketa fisikoa eginda, elikadura osasuntsua izanda, alkohola utzita eta sedentarismoari aurre eginez.

Beraz, zaindu ezazu zeure burua eta ohitura osasuntsuak izan!!

Bukatzeko, bitxikeri bat elkarbanatu nahi dugu zurekin: gaur hain zuzen ere, Yeray Álvarez, Athletic-eko jokalaria minbizia izan duena, zelaira bueltatu da bere bizitzako partidarik gogorrena irabazi ondoren, minbiziaren aurkakoa. Aupa Yeray eta borroka horretan dauden guztiak!!

AUSARTA AL ZARA?

Hemen gaude berriro ere!

Ez dakigu bat zatozen gurekin, baina gure ustez ume txikien ipuinek irakaspen handiak izan ditzakete hain umeak ez garenontzat ere bai. Hurrengoan, umeen hizkeran azaltzen da mundu guztiaren ahotan dagoen egungo gaia. Adi arazoari eta proposatutako konponbideari.

Ziur gaude identifikatu duzula arazo barik zein den gaia: berdinen arteko tratu txarrak, edo, beste era batera esanda, bullying-a. Hasieran aipatu dugun bezala, modan dagoen berba da eta, tamalez, honekin lotutako albisteak entzuten dira. 

Azter dezagun ikusitako ipuina: izatez, "Sentipuina" da, sentimenduekin lotutako ipuina, hain zuzen ere. Identifika ditzakezu zein sentimendu agertzen dira? Onak ala txarrak dira? Txarrak diren sentimenduak saihesteko modurik bururatzen al zaizu?

Istorioari begira, galdera sorta datorkigu burura: inoiz ikusi duzu zure eskolan Samuelek bezala jokatzen duen ikaskiderik? Zer deritzozu bere portaerari? Bakarrik al dago Samuel ipuinaren hasieran? Zergatik egongo dira bere alde klasekideak Alan jipoitzen duenean? Alanen jokaera, maisuari gezurra esatea alegia, bere buruari laguntzen ote dio? Zer erabaki hartu du Alanek Nalarekin hitz egin ondoren? Zer egingo zenuke zuk bere zapatetan egongo bazina?

Zer deritzozu ausarten kluba osatzeari? Horrela bada, zure ustez, zeintzuk dira klubean egoteko baldintzak?  Proposamen bat luzatu nahi dizugu: ausartzen zara bullying-ari planto egiteari sormena erabiliz? Antolatu talde batekin eta prestatu abesti bat, marrazki bat, edo dena delakoa, ikastolan holako portaerak ez direla ongi etorriak adierazteko.

Aurrera joan baino lehen, une batez geldituko gara gogora ekartzeko ilegorriaren kasua, gogoratzen duzu? Suedian grabatutako iragarkia da. Jarraian ikusiko ditugunak, horrelako egoerak salatzeko asmoarekin daude eginda ere bai eta, beharbada, irudikatzen diren egoerak, hurbilak izango dira zuretzat. Grabazio motzak baina oso esanguratsuak dira. Ikusi bitartean, ondoriak atera:

Ikusten duzunez, bullying-a pairatzeko jipoiak ez dira beharrezkoak. Badira mina egiteko modu gehiago: hitz itsusiak esatea edota pertsonak gutxiestea eta baztertzea oso mingarria izan daiteke. Beraz, hitz egin baino lehen pentsatu zertarako esaten dituzun ahozkatzen dituzun hitzak eta nolako portaera, trataera eta jokaera dauzkazun besteekiko. Horrelako egoera somatzen baduzu beste batengan, jo ezazu nagusi batengana eta salatu. Kendu burutik "txibato" izatea dela, ezta pentsatu ere! Tratu txarreko egoera salatzea ez da koldarra izatea, guztiz kontrakoa baizik.

Beste bideo bat partekatu nahi dugu zurekin, azken egunotan hainbat sare sozialetik jaso duguna, El Langui-k eginikoa. Egia esan, Mediaset-en iragarkia da, baina abestia Los 40-n ere ikusi eta entzun dugu. Fenomeno birala bihurtzear omen dago. Segur aski ezagutzen duzu dagoeneko, baina guk ekarri dizugu mezu potente baino potenteagoa baitauka eta gaurko gaiari primeran doakiolako. Entzun arretaz!!!

Zer deritzozu letrari? Inoiz lagundu duzu horrelako egoera batean zegoen kide bat? Zergatik? Zer egin zenuen laguntzeko? Aurrerantzean horrelako zerbait somatzen baduzu, ausartuko zara ausarta izaten?

Bukatzeko, salatzearen kontua oraindik argi ez baduzu, beharbada hurrengo bideoak lagunduko dizu argiago ikusten. #stopbullying, BBKren kanpaina berria eskola-jazarpenaren aurka da, eta egia borobila esaten du:

“Zure isiltasuna, bere indarra” leloarekin, kanpainaren ardatza taldekideen konplizitate aktibo edo pasiboaren garrantzia da, jazarritako pertsonarentzako laguntzari dagokionez. Kanpainarako sortu den rap musika izen bako poema ospetsu batean oinarritzen da, “Etorri ziren” delakoan, eta hartzailea jazarritako pertsonaren lekuan jartzea lortu nahi du. Lortu du zurekin?

URTARRILAK 30: INDARKERIAREN KONTRAKO ETA BAKEAREN ALDEKO ESKOLA-EGUNA

Kaixo!

Gaurko eguna ezin zaigu oharkabean joan, egun berezia da eta gaurko sarrera aprobetxatu nahi dugu hausnartzeko eta zerbait ikasteko ere bai, zergatik ez!!

Izenburuan isladatu dugun bezala, gaur, hilak 30, indarkeriaren kontrako eta bakearen aldeko eskola-eguna da. Urtarrilak 30ean, hezkuntzan azpimarratu behar diren baloreen artean tolerantzia, elkartasuna, konkordia, Giza Eskubideen errespetua, indarkeria eza eta bakea daude. Ez da ahuntzaren gauerdiko eztula, ez! Egun honetan eskolak, arraza, kultura eta erlijio desberdinetako pertsonentzako, bakea eta ulermenaren aldeko baliabideak izango dira. Baina, bakarrik egun bateko ospakizuna izan behar da? Penagarria da horrelako egun bat leku berezia behar izatea. Zure ustez, zer esan nahi du horrek?

Zer dela eta data honetan? Egun horretan Indiako lider nazionala eta espirituala izan zen Mahatma Gandhiren heriotzaren urteurrena ospatzen da, Indiar integrista batek 1948 urtean tiroz erail zuen. Baina... Nor izan zen gizon hori? Mohandas Karamchand Gandhi Indian 1869 urtean jaio zen eta munduko bakezaletasunaren ordezkari nagusiena da.

Hurrengo bideoak oso ondo azaltzen du bere bizitza:

Egunaren historia, jatorria eta Gandhiren bizitza aparte utzita, elkarbanatu nahi dugu zurekin bideo bat, irakaspen handikoa hain zuzen ere. Gerra batean izandakoa da protagonista eta "Imagine", bakea sinbolizatzen duen John Lennon-en kanta, abestuko du. Horrela azalduta, ez dirudi oso erakargarria izango denik, baina bere hitzak entzuterakoan, ziur gaude zentzua ulertuko duzula. Ikus dezagun!

Beharbada urrun samar gelditzen zaigu adibide hau... Horregatik hurrengo bideoa ekartzen diguzu, geure eguneroko bizitzan hurbilago dagoena.

Haur txikien kontua dirudien arren, hau adibide oso hurbila dugu, zoritxarrez horrelakoak ikasleen artean maiz gertatzen baitira, eta hortik abiatu beharko zinateke indarkeriaren kontra borrokatzeko eta bakearen aldean jokatzeko.

Bukatu baino lehen Eduardo Galeano idazlearen oso esaldi adierazgarria partekatu nahi dizugu:

Bururatzen zaizu zer egin dezakezun zuk mundua aldatzeko?

Emakume talde hau hasi da zerbait egiten, milaka emakume judutar, musulman eta kristau 200 km-ko martxa egin zuten pasa den urrian munduko bakea aldarrikatzeko nahian. Hona hemen bideo eta kantu hunkigarri hau:

Itxaropen kantu hau egia bihurtu dadila!!

NORBERAREN MOTXILA

Kaixo balorezale hori!

Ikasturtea aurrera doa, gai asko landu ditugu dagoeneko hemendik, baina kontu asko hausnartzeko eta ikasteko dituzu oraindik ere. Guk jarraitzen dugu ekarpen aberasgarriak bilatzen zurekin gogoeta egiteko eta ikasketaren bat egin dezazun.

Hasi baino lehen, ariketa praktikoa luzatuko dizugu. Zure irakasleak paper bat emango dizu, bertan, marraztu beharko duzu ondorengo irudia:

Segur aski 3 zenbakia dela pentsatuko duzu, baina erratuta zaude eta egiaztatuko dizugu: emaizkiozu bira batzuk paperari, ikusi alde ezberdinetatik, eta, irudi horretan oinarrituta, egin marrazki bat. Gehienez 5 minutu izango dituzu horretarako. Zertan bihurtu da? Zure ikaskideen ekoizpenak ikusi ondoren, 3 zenbakia baino ez dela pentsatzen jarraitzen duzu? Besteek plazaratu dituzten ideia guztiak bururatu zaizkizu zuri ere bai edo baten batek harritu zaitu? 

Momentuz ez diogu marrazkiari garrantzi gehiagorik emango. Aurrerago hartuko dugu berriro, baina orain jakin nahi dugu, sarreraren izenburua irakurrita, zer datorkizun burura eta sarrera zertan datzala uste duzun. Hau da, hipotesiak egingo dituzu. Geroago, bideoa amaitu ostean, konprobatuko dugu asmatu egin duzun... Ezer esan baino lehen, ez ahaztu baloreetan oinarritzen garela beti eta egindako marrazki horrek zerikusia duela bideoarekin.

Orain, egiazta dezagun hipotesirik bete egin den. Bideoa ikusi ahala, susmatzen zenuen horrela amaituko zela? Zelako amaiera espero zenuen? Zergatik hautatu dugu izenburu hori? Ulertzen duzu ikusitakoarekiko loturarik? 

Argi dago pertsona bat epaitu baino lehen, pertsona horrek atzean duen guztia jakin beharko genukeela, ezta? Askotan ez dakigu eta ez dugu zertan jakin behar ere; beraz, kontuz ibili beharko genuke esaten eta egiten dugunarekin, guzti-guztiok motxila gainean daramagulako, batzuk beteago beste batzuk baino, baina azken finean, bakoitzak dauka berea. Ez da lan erreza, noski! Baina informazio eskasa izanda, aurreiritzia bota baino lehen, hobe ahoa itxita mantentzea. Horrelako egoera batean egonez gero, espero dugu bideo hau burura etortzea eta, gutxienez, geldiaraztea eta pentsatzea mintzatu baino lehen.

Baina hau ez da bideo honetatik atera daitekeen ondorio bakarra, ez...

Demagun beste neskak zigorra ederra jasotzen duela egindakoagatik, hobeto sentituko zen Mariana hori jakinda? Zigorra soilik lagungarria da? Zer egin genezake erasotzailearekin ulertarazteko egin duena ez dagoela ondo eta ikas dezan hurrengoetan hobeto jokatzen besteekin?

Mundu guztiak ondorio berdina jaso beharko luke eraso egiteko "arrazoioa" izaten dena izaten dela?

Orain arte erasotzaileari buruz ari izan gara, baina ezin dugu ahaztu Mariana zelan senti daitekeen. Kasu honetan Marianak bakarrik aurkitu du erasotzaileak horrela jokatzearen zergatia, baina beti ez daukagu aukera hori... Horrela izatekotan, zelan jokatu ahal dugu? Ezin garenez besteen bizitzan sartu, gure ustez, onena da pentsatzea besteak ez duela apropos egiten eta bere motxilak ez diola uzten behar bezala jokatzen. Beharbada horrek apalduko du gure mina eta aurre egin ahal izango diogu egoerari modu egokian. Horrek ez du esan nahi zama astuna eramateagatik bidezkoa denik txarto jokatzea eta baimena dugunik nahi duguna egiteko. Ezta pentsatu ere!

Hau guztia aztertu ondoren, marrazkiaren jarduerari ekingo diogu. Zer nolako lotura dauka aztertu dugun guztiarekin? Hasierako 3 hori zertan bihurtu da? Zergatik? Zerbaiten zati bat baino ez badugu ikusten, ez genuke epaitu behar osorik ikusi gabe, ez duzu uste? Baina gehiago ikusteko, ahalegin handia egin behar dugu. Pentsa ezazu orain gogoko ez duzun pertsona batengan eta galdetu zeure buruari pertsona horren istorioa ezagutzen duzun. Beharbada honek laguntzen zaitu zentzuz jokatzen eta geldiarazten zaitu ezer esan baino lehen. Hala izatea espero dugu behintzat!

Guk uste dugu ondorioztatu ahal dugula premiazkoa dela bestearen zapatetan jartzea, pelikula bere ikuspuntutik ulertu ahal izateko. Jarraian txertatuko irudiek oso ondo adierazten dute ideia hori:

Gaurko sarrerarekin espero dugu kontu batzuen ikuspuntu zabalagoa izatea eta besteen egoerak modu desberdinean ikustea, enpatia handiagoa izatea, alegia.

EREDU APARTAK

Kaixo guztioi!

Pasa den asteko "gonbidatuak" eredu adoretsu apartak izan ziren biak eta norbere gainditze eredu bikainak ere bai, baina noski, ez dira bakarrak.

Hurrengo bideoaren protagonista Mark Goffeney dugu. Beharbada ezagutzen duzu musikari honen berezitasuna, El Hormiguero telesaioan agertu baitzen iaz. Ez baduzu ezagutzen, disfruta ezazu hurrengo bideoekin.

Lehenengoan Mark Kontserbatorioko ikasleei masterclass bat ematera joaten zaie. Ikasle batzuen ezpainetan argi eta garbi isladatzen dira harridura eta lilura hitzak. Beste batzuk aho bete hortz geratzen dira... Besterik gabe, ikus dezagun zergatik!

Zure aurpegian ere bai Markek eragindako harridura isladatu dela ziur gaude, baina oraindik ez du bukatu... El Hormigueroko zati txiki bat ikusiko dugu eta badakigu oraindik gehiago ere harrituko zarela.

Espero zenuen munduan holako kitarjolerik existitzea? Zure ustez, Markek bere burua onartu al du? Nola hartu du bere "ezintasuna"? Zer egin du aurrera egiteko?


El Hormiguero irten zen beste eredu bat (eskerrik asko Leire M.!):

Berriz ere txundituta geratu zarela somatzen dugu...

Baina ez da guztia bukatu, oraingo ereduak txapela kentzeko modukoak ere bai. Protagonista hauek ez dira musikoak, kirolariak baizik, nahiz eta lehenengo itxuran ez diruditen... Askotan, ikusten dugunak engainatzen gaitu, bestela ikusi zer gertatzen den hurrengo bideoan!

Fijatu zara zelako begiradak dauden kirolari paralinpiko hauek agertzen diren tokietan? Eta kirolari ekiten diotenean eta besteek espero ez dutena ikustean? Ez du ematen protagonistek ikusi dituztenik harridura aurpegi eta keinu horiek, baina, ikustekotan, zelan sentituko ziren? Nola lortu dute horraino heltzea elbarriak izanik?

Gaurko sarrerako ereduak ikusita hitzik gabe geratu arren, gutxienez pentsaraztea eta hemendik aurrera kanpoko itxuraz ez fidatzea espero dugu...

URTARRILAK 15: MARTIN LUTHER KING JR-EN EGUNA

Kaixo lagun hori!

Baloreak lantzen dugun blog honetan, gaurko eguna ezin zitzaigun eskapatu, Martin Luther King eguna hain zuzen. Balorezale amorratua izan zen eta horregatik omenalditxoa egin nahi diogu hemendik gaur, nor zen gizon ospetsu hau ezagutarazi nahi dugu.

Martin Luther King ekintzaile afroamerikarrak boto-eskubidearen alde, diskriminazioaren kontra eta beste hainbat oinarrizko eskubideren alde martxak antolatu zituen. Baina batez ere bere "I Have a Dream" (Amets bat dut) diskurtsoagatik da famatua.

Afroamerikarrek AEBetan jasaten zuten diskriminazioa salatu zuen Luther Kingek, eta afroamerikarren eskubide zibilen alde lan handia egin zuen bizi osoan zehar. Hala ere, batez ere Washingtongo martxan egin zuen hitzaldiagatik da ezaguna. Izan ere, hitzaldi horrek bultzada handia eman zion afroamerikarren eskubide zibilen aldeko iraultzari.

‘I have a dream’ esaldia ez esateko aholkatu zioten Luther Kingi, aurretik askotan errepikatu zuelakoan. Aste horretan bertan, Chicagon, amets bat zuela azpimarratu zuen Luther Kingek milaka jarraitzaileren aurrean.Hitzaldia Washingtoneko hotel batean prestatu zuen.

Hurrengo egunari begira dokumentu bat idatzi zuen, eta bertan ez zen bere esaldi famatuena agertzen. Hala ere, inprobisazioaren alde egin eta diskurtsoa goitik behera aldatzea erabaki zuen.

Egun horretan ere entzuleen txaloak jaso zituen, ez bakarrik esaldi ospetsu horrengatik, baita 16 minutuko hitzaldian zehar erabilitako beste hainbat esaldirengatik ere.

FBI Luther Kingen atzetik ibili zen urte horietan: “komunistekin” ustez izan zituen harremanak aztertu zituzten, eta Luther King “AEBetako ekintzaile beltz arriskutsuena eta eraginkorrena” zela esan zuten.

1964. urtean, Bakearen Nobel Saria eman zioten Luther Kingi.

1968. urtean hil zuten, Memphisen, tiroz, martxa batean parte hartu aurretik. 

Esaldi ederrak utzi zituen Martinek, hona hemen lagin txikia:

Esanguratsuak benetan!!

Besterik gabe, aste ona izan!

EZINA EKINEZ EGINA

Kaixo irakurle hori!

Oporraldi ezin hobea eduki izana espero dugu. Gaurko sarreraren asmoa da hasi berri dugun hiru hilabeteari bultzada bat ematea. Segur aski berriro ikastolara bueltatzeko gogoak zenituen, lagunekin egoteko, gauza berriak ikasteko ;) eta abar.

Behin irakasle batek azaldu zigun bigarren hiru hilabetea garrantzitsuena dela. Lehenengo notak onak edo txarrak izatea ez da inportanteena. Oraindik ez dago ezer erabakita. Zure aurrean bi bide dauzkazu. Lehenengo bidea luzea izango da, askotan malda itzelak igo beharko dituzu, beste batzuetan, hotza egiten duen bidea izango da baina, amaieran, arrakasta lortuko duzun ziurtasuna daukazu, eta horrek ez du esan nahi ondo pasatuko ez duzunik! Beste bidea, ordea, askoz erosoagoa izango da, bero egingo du, lurra laua izango da... baina arrakastaren geltokitik urrun eramango zaitu. Zuri dagokizu aukeratzea. Zuk erabaki behar duzu zer den garrantzitsuagoa zuretzat eta zer lortu nahi duzun.

Gure hitzak lagin batekin irudikatzeko hurrengo bideoa luzatzen dizugu:

Neska horrek bi aukera zituen: bat erraza, negarri eustea eta aitari besoak luzatu igotzeko eskatzen;  eta bestea, aukeratu duena, zailagoa baina helburu zehatza zeukan eta hori lortzeko gogo erraldoia. 

Argi dago berak bakarrik ezin ziola erronkari aurre egin, pertsona bat izan du bere ondoan baina esfortzua berea da, ondoan dagoenak egiten duena keinu bat baino ez da. Benetan balio duena da neskaren ahalegin handi hori. Noren laguntza jasotzen du neskatilak? Nork lagundu ahal zaitu zu? Nagusiek bakarrik? Gehiago dakitenek bakarrik? Eta, zergatik ez? Zu zeu ere izan zaitezke beste baten laguntza, ez duzu uste? Laguntza mota anitz daude eta askotan ez dugu behar erantzuna esatea, solik ondoan egotearekin nahikoa da bestea babestuta eta lagunduta senti dadin, eta hori izan daiteke behar duen guztia, bakarrik ez sentitzea.

Helburu zehatza eta gogo nahikoa izanik, bide erdia baino gehiago eginda duzu. Bestea erronkari ekitea baino ez da. Beti aurkituko duzu norbait bidean laguntzeko prest zure ondoan behar baduzu.

Orain arte esandako guztia oso ondo adierazten duen beste bideo bat ekartzen dizugu. Ikusi aurretik bideo beraren istorioa azalduko dizugu. Alemaniako pertsona batek egindako iragarkia da eta hango entrepresa famatu bati eskaini zion bere publizitatea egiteko. Entrepresak ez zuen kontratatu baina, bideoa, “birala” bihurtu egin da. Beharbada lehengo helburua ez du lortu, baina eman nahi izan zuen mezua espero baino askoz gehiago zabaltzen ari da sare sozialei esker. Goazen ikustera:

Zer egin nahi du gizonak? Zer egin du lortu ahal izateko? Berak bakarrik lortu dezake? Zeren beharra dauka? Nork lagundu du eta nola? Zure ustez, zer ikasi ahal dugu eredu horretatik? 

“Ezina ekinez egina”, hori da gaurko sarreraren izenburua. Zer demontre esan nahi du hitz-korapilo horrek? Nahiz eta helburu zaila izan, nahi badugu, beti aurkituko dugu lortzeko modua. Hasiera batean ezinezkoa ematen duena, behin eta berriro saiatzen bagara, geure helburua lortuko dugu. Horretaz aparte argi izan behar dugu maite gaituztenak ondoan izango ditugula laguntzeko prest. Lagundu hitzak bi esanahi potolo ditu eta, kasu honetan, bietarako erabiltzen dugu: gure ondoan egoteko eta laguntza emateko. 

Beraz, aitzakia gutxi daukazu orain bide luzea eta neketsua aukeratzeko, saria merezita izango duzu eta zeure buruarekin harro sentituko zarela ziur gaude. Eutsi Goiari!!

ERREGE MAGU MAITEOK...

Kaixo lagun hori!

Gabonak ez dira oraindik bukatu baina guk, nahiz eta oporretan egon, lanean jarraitzen dugu zuri ekartzeko zerbait interesgarria gogoetarako. Gaurko sarrera kontsumoarekin loturik dago, opariak egiteko garaian gaude eta telebista iragarkiz josita dago, batez ere haurren jostailuak iragartzen dituzte etengabe kate guztietan. 

Inoiz gelditu zara une batez pentsatzeko zelan dauden eginda eta bideratuta iragarki horiek? Hurrengo bideo honek primeran azaltzen dugu ume baten ahoan.

Zergatik bete behar dugu iragarkiek agintzen dutena? Garrantzitsuena ondo pasatzea da, bakoitzak nahi duen moduan eta nahi duen jostailuarekin. Askea izan eta jolas zaitez nahi duzunarekin!!

Ildo beretik joan da Audi konpainiaren aurtengo Gabonetako iragarkia. Zeharo harrituta utzi gintuen ikusi genuenean genero berdintasuna isladatzeko moduagatik, horregatik partekatu nahi dugu hemen. Besterik gabe, ikus dezazun!

 

Hemendik gure zorionik beroenak Audirentzat berdintasuna aldarrikatzeagatik horrelako iragarki batean.

Amaitzeko, duela hilabetetik gutxi gorabehera, telebistan ematen ari diren iragarkia luzatzen dizugu. Ziurrenik ikusita daukazu, Euskalten eskutik dator, baina gelditu zara ikertzeko esaten duen guztia? oso mezu potente dauka, nagusi zein gazteontzat... Euskaltelen iritziz, kontua ez da zer adinetan hasten diren erabiltzen gazteak mugikorra, baizik eta zer balioren arabera. Horregatik telefonoaren jabe gazte berriek erabilera egokia ikas dezaten  hitzarmena eskaintzen du. 

Hiru bideo hauekin ikuspuntu zabalagoa izan dezazun espero dugu.

Ondo bukatu oporrak!